БНСУ-д энэ он гарсаар 1 сая 500 мянган гадаадын иргэд амьдарч байгаа гэж тоологдсон бөгөөд Солонгос улс дахь 10 гэр бүл тутмын 1 нь хосолмол соёлт гэр бүл аж. Тус улсад 2002 оноос гадаадын харъяат иргэдтэй,  ялангуяа гадаад  бүсгүйчүүдтэй гэр бүл болох сонирхол эрс нэмэгдэж, өнгөрсөн 10 жилийн туршид  нийт 326794 хосолмол соёлтой гэр бүлүүд бий болсон аж. Гадаад бэрийн 132300  нь хятад, 59687 нь Вьетнам, 13785 нь Филиппин, 6124 Камбожи улсын  иргэд тус тус байна. Харин гадаад хүргэний 26751 нь  Япон, 23860 нь хятад,13734 нь АНУ,   нь Австрали,  1358 нь Англи улсын иргэд тус тус байгаа гэнэ. 2012 онд тус улсад хийгдсэн эдийн засгийн судалгаагаар 1 гишүүнтэй өрхийн нэг сарын хамгийн бага орлого 553344 вон, 2 ам бүлтэй  бол 942187 вон , 3 ам бүлтэй  бол 1 сая 218 мянган вон , 4 ам бүлтэй бол 1 сая 495 мянган вон байх тооцоо гарчээ. Харин хосолмол соёлт гэр бүлүүдийн тал хувь нь буюу 53.7 хувь нь өрхийн орлогын хамгийн доод түвшнээс ч бага орлоготой буюу ядуу гэсэн ангилалд багтаж, хөдөө орон нутагт газар тариалан эрхлэн амьдардаг Солонгос нөхөртэй гадаад бэрүүдтэй гэр бүлүүд байдаг аж. Солонгос эрэгтэйчүүд хятад улсын харъяат эмэгтэйчүүдтэй  гэр бүл болохыг илүүд үздэг бол Солонгос бүсгүйчүүд Япон эрэгтэйчүүдийг илүүд үздэг байна. Харин эдгээр хосолмол соёлт гэр бүлүүдийн дунд, Монгол эмэгтэйтэй гэр бүл болсон 4417 солонгос эрэгтэй  бүртгэгдсэн аж. Харин өнгөрсөн жил 4450 хосолмол соёлт гэр бүл гэрлэлтээ цуцлуулсан гэнэ. Хосолмол соёлт гэр бүлийн Солонгос  эрэгтэйн дундаж нас 36.1, гадаадын бэр эмэгтэйн дундаж нас 26.6 байгаа бөгөөд тэдэнд зориулж тухайн орон нутгаас төрөл бүрийн хөнгөлөлт үзүүлж аялал зугаалга, үзвэр үйлчилгээ, үнэгүй сургалтанд хамруулах зэргээр тусладаг ч насны зөрөө, амьдрах зуршил, соёлын ялгааг арилгаж чадахгүй байгаа тул гэр бүл салалт өсөн нэмэгдэж байгаа гэнэ. П.Наран