Укрианы зүүн нутгийн Донецк хотод зорчигч тээврийн AН-24 онгоц осолдож улмаар  ослын буулт хийх үеэр таван хүн амь насаа алджээ. Харин уг ослоор 22 хүн бэртэж гэмтэн эмнэлэгт хүргэгдсэн байна. Онгоц дотоодын нислэг үйлдэж байсан бөгөөд Хар тэнгисийн Одесс дахь амралтын баазаас хөөрсөн аж. Онгоцонд 40 гаруй хүн зорчиж байжээ. Тэдгээр хүмүүсийн дунд хэд хэдэн улс төрч болон нөлөө бүхий бизнесмэн хүмүүс байсан аж. Зорчигчид хөлбөмбөгийн аваргуудын лигийн тоглолт үзэхээр  явж байсан нь тэр гэнэ. Нислэгийн үеэр онгоцонд гал гарснаас болж Донецкийн онгоцны буудалд ослын буулт  хийх болсон ажээ. Одоогоор ослын шалтгааныг бүрэн тодорхойлоогүй байгаа юм. Гэрчүүдийн ярьж буйгаар онгоцонд хаа нэгтээгээс их өтгөн утаа гарч онгоцыг бүхэлд нь бүрхсэн бөгөөд хүмүүс үймж эхэлсэн байна. Харин аз болоход Донецкийн онгоцны буудал ойрхон байсан  учир учирч болох хохирлоос бага хохирол учирлаа хэмээн албаныхан мэдээлсэн гэв. Уг онгоц хос хөдөлгүүртэй байсан нь ослын буулт хийхэд их сайн нөлөө үзүүлсэн байна. Э.Мөнхнасан