Улаанбаатар хотыг 2020 он хүртэл хөгжүүлэх Ерөнхий төлөвлөгөөний тодотголын төслийг УИХ намрын чуулганы отгон хуралдаанаараа баталсан билээ. Энэхүү төлөвлөгөөнд тусгагдсан  дахин төлөвлөлт хийх гэр хороолол буюу  нийслэлийн Сонгинохайрхан дүүргийн 5,6,7-р хороо Ханын материал орчим, 10-р хороо Арьс ширний үйлдвэрийн ажилчдын нийтийн байр орчим, Сүхбаатар дүүргийн 15-р хороо Дамбадаржаагийн 58-р сургууль, Чингэлтэй дүүргийн  12,15-р хороо 72-р сургууль, 7-р хороо МҮОНРТ-ийн орчим, Баянзүрх дүүргийн 7-р хороо Цэргийн их сургууль,12-р хорооны Амгалан орчимын гээд нийт 12  байршилд бүтээн байгуулалтын ажил энэ дөрөвдүгээр сард эхэлнэ. Үүнтэй холбоотойгоор нийслэлийн Засаг дарга бөгөөд Улаанбаатар хотын Захирагч Э.Бат-үүл гэр хорооллын дахин төлөвлөлтийн тухай А/99 дугаар захирамжийг гаргажээ. Энэхүү захирамжинд, Гэр хорооллын дахин төлөвлөлт хийхээр батлагдсан 12 байршлын нэгж талбарт хамрагдсан газар эзэмшигч, ашиглагч, өмчлөгч иргэд, аж ахуйн нэгжийн судалгааг гаргахыг нийслэлийн Өмчийн харилцааны газар /Ш.Төмөрбаатар/-т, Гэр хорооллын хөгжлийн газар /Ш.Ганхуяг/-т тус тус даалгасан байна. Улмаар тухайн байршилд газар эзэмших, ашиглах, өмчлөх эрх шилжүүлэх үйл ажиллагааг хэсэгчилсэн ерөнхий төлөвлөгөөний зураг төслийг боловсруулан батлуулах хүртэлх хугацаанд түр зогсоохыг нийслэлийн Өмчийн харилцааны газрын даргад даалгажээ. Дээрх Нийслэлийн Иргэдийн Төлөөлөгчдийн Хурлын тогтоолтой холбогдуулан дахин төлөвлөлт хийгдэх гэр хорооллын байршлын талбайд хамрагдсан иргэдийн шилжилт, хөдөлгөөнийг түр зогсоож, бүртгэлд өөрчлөлт оруулахгүй байхыг нийслэлийн Улсын бүртгэлийн газар /С.Содномдорж/-т , дүүрэг, хороодын Засаг дарга нарт үүрэг болгосон байна. Д.Цэцэг