Төр шашны нэрт зүтгэлтэн, Зүүн хязгаарыг илбэн тохинуулах сайд асан, Халхын тамгатай хутагт, Егүзэр хутагт Ж.Галсандашийн хөшөөг дээдлэн залах ёслол Сүхбаатар аймгийн төв Баруун-Урт хотод өчигдөр боллоо. Егүзэр хутагтын хөшөөг арваад жилийн тэртээ Сүхбаатар аймгийн Онгон сумын уугуул, МУСГЗ, уран барималч Х.Цэвэгмид зэсээр урлаж байсан бөгөөд энэхүү хөшөөг сэргээн залах тухай Х.Цэвэгмид агсны гэр бүлийнхний санаачилгыг "Мөнхчулуун" сан дэмжиж, хөшөө эргэн амилсан нь энэ аж. Хөшөөний сүншиг аравнайг  бурханч лам Г.Пүрэвбат  үйлдэж, төрийн дархан Ж.Төмөрбагана сэргээн засварлажээ. Хөшөөнд төр, шашны дэг ёсыг хослуулан  суурь болоод цээжин тушаа намтар цадиг, ном судар, монгол орны ариун дагшин газар нутгийн шороо, ус рашаанаас дээжлэн оршоосон аж. Хөшөөний нээлтийн үеэр "Сүхбаатар" кино театрт Егүзэр хутагтын эдэлж хэрэглэж байсан эд зүйлс, үүх түүхийг нь өгүүлэх ном судруудаар үзэсгэлэн дэлгэгдсэн байна. Мөн Сүхбаатар аймгийн Эрдэнэцагаан сумын ИТХ, ЗДТГ болон "Мөнхчулуун" сан, "Жавхлант шарга" МСУХ-оос хамтран зохион байгуулж байгаа энэхүү ёслолын ажиллагааны үеэр хаврын уралдаан давхцсан юм.   П.Наран