Нийслэлийн прокурорын газрын орлогч прокурор Ц.Батболдоос тус газарт хянагдаж буй  олон нийтийн анхаарлыг татсан хэргүүдийн талаар дараахь асуултад хариулт авлаа.

-“МИАТ” компанитай холбоотой мөнгө угаасан гэх хэрэгт арилжааны банкуудыг шалгаж байгаа гэсэн мэдээлэл хэр үндэслэлтэй вэ?

-Мөрдөн байцаалтын ажиллагаа явуулж буй хэргийн талаар мэдээллийг хязгаарлалтай өгөх ёстой. Үүнийг та бүхэн ойлгоорой. “МИАТ” компанийн хэрэгт 9 хүнийг холбогдуулан шалгаж байгаа. Хэвлэл мэдээллийн хэрэгслээр  гарсан  “САПУ” компанийн захирал Н.Алтан зэрэг хүнийг  мөнгө угаасан хэрэгт холбогдуулан шалгаж байгаа зүйл алга. Арилжааны банкуудыг холбогдуулан шалгасан юм байхгүй. Сүүлийн үед гарч байгаа их хэмжээний мөнгөтэй холбоотой хэргүүдэд холбогдсон сэжигтнүүд   банкуудаар дамжуулан  гүйлгээ хийсэн тохиолдол бий. Банкинд мөнгө хадгалуулсан зэргээс  үүдэн тэр байгууллагуудтай холбоотой мэдээллүүдийг олж  авах ажиллагааг явуулж байна. Түүнээс биш арилжааны банкууд мөнгө угаасан хэрэгт холбогдон шалгагдаагүй.

Татварын ерөнхий газрын зарим албан тушаалтанд холбогдох хэргийг шалгах явц хэр ахицтай байна вэ?

-Татварын ерөнхий газрын зарим хэлтсийн дарга нар албан тушаалаа ашигласан хэрэгт холбогдсон. Одоогоор уг хэрэгт дөрвөн хүнийг холбогдуулан шалгаж байна. Эдгээр хэргүүд мөрдөн байцаалтын ажиллагаа явуулахад нэлээд ээдрээтэй, хугацаа шаардахуйц, гадаад, дотоодоос  баримт мэдээлэл  цуглуулах шаардлагатай. Дээр нь банк санхүүгийн  байгууллагатай холбоотой мэдээлэл авах зэрэг ажиллагаатай холбоотой нэлээд хугацаа шаардагдах байх. Энэ хэргүүдийн мөрдөн байцаалт үргэлжлээд явагдаж байгаа.

-Д.Батхуягийн хэрэгт хамтрагчаар оролцсон Н.Бат-Ирээдүйн гэрээс их хэмжээний мөнгө хураан авсан гэж үнэн үү?

АМГ-ын газрын дарга асан Д.Батхуягийн хэрэгт холбоотой Н.Бат-Ирээдүйн гэрээс мөрдөн байцаалтын шатанд тодорхой хэмжээний мөнгө олдсон гэх мэдээлэл хэвлэлээр цацагдсан. Д.Батхуягийн хэрэг  шүүхээр шийдэгдсэн учраас  бид мөрдөн байцаах ажиллагааны талаар дэлгэрэнгүй ярих шаардлага байхгүй. АТГ-аас энэ хэргийн  талаар тодорхой мэдээлэл өгсөн байх.

-Нийслэлийн прокуорын газарт хянагдаж байгаа хэргүүд дотор УИХ-ын  болон Засгийн газрын гишүүдтэй холбогдсон хэрэг бий юу?

-Ажиллагаанд ганц нэг хэрэг бий. Мөн УИХ-ын гишүүн асан Д.Дондогт холбогдох хэргийг шүүхэд шилжүүлсэн. Одоо УИХ-ын гишүүнээр ажиллаж байгаа  цөөн гишүүний хэрэг мөрдөн байцаалтын шатанд бий. Гэхдээ хэргийн  талаар мэдээлэл өгөх боломжгүй.

-Уучлаарай, яг ямар төрлийн гэмт хэрэгт холбогдсоныг тодруулаач?

-Албан тушаалаа урвуулан ашигласан хэрэгт  шалгагдаж байгаа гишүүн бий.

-УИХ-ын гишүүн С.Зориг агсны хэргийг шалгах явц юу болж байна?

-С.Зориг агсны хэрэгт сүүлийн хоёр жилийн хугацаанд ажлын хэсэг томилогдон ажиллаж байгаа. Ажлын хэсэг холбогдох шалгалтын ажлыг явуулж байна. Түүнээс биш ийм ахиц гарлаа гэж мэдээлэх боломж алга. Гэхдээ шалгалтын ажлыг үргэлжлүүлэн явуулж байгаа. АНУ-аас Монголын хоёр иргэнийг талийгаач С.Зоригийн хэрэгт холбогдуулан баривчлаагүй. Манай зүгээс АНУ-ын хуулийн байгууллагад хүсэлт тавьж, ажиллагаа явуулаагүй. Энэ мэдээлэл манай хуулийн байгууллагаас эх сурвалжтай мэдээлэл биш. Хаанаас  ийм мэдээлллийг  гарч, хэвлэл мэдээллээр цацагдсан эсэхийг шалгаж байгаа.

-АТГ-ын дарга агсан Б.Дангаасүрэнгийн ар гэрийхнээс Ерөнхий прокурорт хандан хэргийг нь сэргээн шалгах хүсэлтийг удаа дараа гаргасан. Үүнд ямар хариу өгсөн юм бол?

-Энэ талаар сайн мэдээлэл алга. Ажлаа аваад 10 гаруй хонож байна. Өмнө нь шат  шатны прокуророос хариу өгсөн тохиолдолд сэргээн шалгах боломжгүй.

Хүнс хөдөө аж ахуйн, хөнгө үйлдвэрийн яамны/хуучнаар/ Жижиг, дунд үйлдвэрийг дэмжих сангийн мөнгө шамшигдуулсан  Т.Гантулга нарын хэргийг хэзээ шүүх рүү шилжүүлэх үү?

- 500 сая төгрөгийг зориулалтын дагуу ашиглаагүй, тодорхой хэмжээг нь хувьдаа завшсан гэх асуудлаар тус яамны  Төрийн нарийн бичгийн дарга асан Т.Гантулга, сайд асан Т.Бадамжунай нарыг төсвийн мөнгийг УИХ-д нэр дэвшсэн зарим хүний сонгуулийн сурталчилгаанд ашигласан байж болзошгүй гэж шалгаж байгаа.  Үүнтэй холбогдуулан нэр бүхий УИХ-ын гишүүд төдийгүй  тухайн үед шийдвэр гаргасан яамны сайд, удирдлагуудыг энэ хэрэгт сэжиглэн шалгаж байгаа.  Мөрдөн байцаалтын ажиллагаа үргэлжилж байна.

Н.Түвшин