“Тэнгис” кинотеатрын хувьчлал хэрхэн явагдсаныг хууль хяналтынхан дөнгөж одоо л шалгаж эхэлж байгаа юм байна. Ингэснээр “Тэнгисийн” гэх шинэ хэрэг сөхөгдөж эхэллээ. Учир нь, хотын төвд байрлалтай тус кинотеатрыг 2003 онд Нийслэл болон хөрөнгө оруулагч талууд хамтран “Улаанбаатар синема” нэртэй  компани байгуулан менежментийн хувьчлалаар оруулжээ. Ингэснээр хөрөнгө оруулагч тал 66, нийслэл 34 хувь эзэмшихээр тохирсон байна. Хамгийн гол нь хотын төвийн үнэ цэнэ бүхий тус барилгыг маш багаар үнэлсэн төдийгүй газрыг нь огт үнэлээгүй зэрэг нь шалгах үндэслэл болсон байна. Харин энэ талаар Нийслэлийн өмчийн харилцааны газраас тодруулахад 2003 он хүртэл “Ялалт” нэртэй байсан тус кинотеатрыг тухайн үед Нийслэлийн засаг дарга байсан Миеэгомбын Энхболд хувьчлах санал оруулж, иргэдийн хурлаар батлуулж байжээ. Ингэхдээ “Вейрич ресорс ази инк” нэртэй Солонгосын компанид барилгын болоод техникийн шинэчлэл хийх эрхийг нь олгосон байна. Тендэр зарласан, эсэх нь ч тодорхойгүй аж. Ямартай ч тус компани Нийслэлтэй хамтран одоо “Тэнгис” кинотеатрын захиргаа болох “Улаанбаатар синема” компанийг байгуулжээ. Ингэхдээ  нийт 1 сая 246 мянган ам долларын хөрөнгө оруулалт хийсэн байдаг. Хамгийн гол нь “Тэнгис” кинотеатрыг байгуулсныхаа шанд тус компани “Тэнгис”-ийн 66 хувийг давуу эрхтэйгээр эзэмшиж байна. Анхнаасаа л ийм гэрээ хийсэн байна гэж өмчийн харилцааны газраас мэдээлж байна. Тухайн үед “Ялалт” кинотеатрын барилгыг  642,291  доллараар үнэлжээ. Энэ нь нийт хөрөнгийн 34 хувь гэж үнэлэгдэв. Хэн ийм хувь хэмжээ тогтоох шийд гаргасан нь ч тодорхой биш аж. Асуудлыг дээгүүрээ л шийдсэн зүйл ажиглагддаг байна. Хамгийн гол нэг асуудал бол хэдийгээр “Тэнгис” кинотеатрын 34 хувийг Нийслэл эзэмшдэг нэртэй боловч асуудалд нь огт оролцож чаддаггүй байна. Монгол кино урлагаа дэмжинэ гэсэн зорилготойгоор анх байгуулагдсан ч өнөөдөр нэг уран бүтээлийг тус кинотеатрт гаргахад орлогын 50 хувийг кинотеатр авдаг зэрэг нь уран бүтээлчдийг дэмжих биш харин бүр дампууруулдаг гэдгийг нь кино бүтээгчид хэлдэг. Ийнхүү хууль бусаар хувьчлагдсан Нийслэлийн өмчит газруудын өмчлөгдсөн явцыг шалгаж эхэлсэн байна. Олон ч цагаан захтан энэ хэрэгт холбоотой нь тодорхой гэж олон нийт хүлээж байна. Иргэний Зориг-Ногоон намын Удирдах зөвлөлийн гишүүн Зоригт гэгчээс эхлээд “Тэнгис” кинотеатрын асуудалд Сү.Батболд, “АПУ” Г.Батхүү гэгчлэн Их хурлын гишүүдийн нэрс холбоотой болох нь тодорч эхлэв. Энэ хэрэг удахгүй нэг тийш шийдэгдэж, хүүхэд, залуусын чөлөөт цагаа өнгөрүүлэх газруудын нэг хувийн хэвшилдээ үлдэх үү, Нийслэлийн өмч байх уу гэдэг асуудал яригдах нь. Эх сурвалж www.wikimon.mn