“Баясгалан” хэмээх усан луу жил төрийн өндөр албан тушаалтнууд болон банкны эздэд таагүй жил болж өндөрлөлөө.

Олон нийтийн анхаарлын төвд байсан долдугаар сарын 1-ний гэх тодотголтой хэргийн учиг тайлагдаж цагдаагийн экс дарга нарт шүүхээс ял оноосон юм.

Түүнчлэн анх удаагаа төрийн гурван өндөр албан тушаал хашиж байсан туршлагатай улстөрч авлигалын хэргээр аавын хаалга татсан нь  шүүхийн байгуулага шударга ажиллаж эхэлсний дохио боллоо гэж магтах хүн ч олон байсан. Шууд.мн мэдээллийн дэлгэцийн сурвалжлагчийн өнгөрсөн жил шүүхийн танхимаас авсан фото зурагнуудаас  хүргэж байна.

Экс Ерөнхийлөгч Н.Энхбаярт албан тушаалаа урвуулан ашигласан гэх хэргээр анхан шатны шүүхээс дөрвөн жилийн хорих ял оноосон юм. Гэвч тэрбээр  доод шатны шүүхийн шийдвэрийг эсэргүүцэн хяналтын шатанд гомдол гаргаснаар түүнийг ялыг дээд шүүхээс 2.6 жил болгон хөнгөрүүлсэн юм. УИХ-ын 2008 оны сонгуулийн үеэр эмх замбараагүй байдал үүсч таван хүн амь үрэгдэж олон арван цагдаагийн албан хаагч гэмтэж бэртсэн хэрэгт тухайн үеийн цагдаагийн удирдлагуудыг холбогдуулсан шүүж ял оноосон. Шүүхээс ЦЕГ-ын даргын үүрэг гүйцэтгэгч асан, хошууч генерал Ч.Амарболдод 6,6 жилийн хорих ял оноож өршөөл үзүүлснээр 3,6 жилийн хорих ялыг биеэр эдлэх шийдвэр гаргав. Нийслэлийн Цагдаагийн газрын дарга асан, дэд хурандаа О.Зоригтод 5,6 жилийн хорих ял оноож өршөөл үзүүлснэээр 2,6 жил хоригдох болов. Эргүүл хамгаалалтын газрын дарга асан, хурандаа Ш.Батсүхэд 6,6 жилийн ял оноосноос 3,6 жилийн хорих ял  болгож өршөөв. Хэв журмын хэлтсийн дарга асан, хурандаа Г.Ганбаатарт 2 жилийн хорих ял оноож өршөөлийн хуулийн үйлчлэлээр сулласан байна. Улсын начин Ц.Улаан мансууруулах бодис хадгалсан, худалдахыг завдсан гэм буруутайд тооцогдож шүүхээс 11 жилийн хорих ял сонсч улмаар ялаа эдэлж байна. УИХ-ын гишүүн З.Баянсэлэнгийг Төрийн албан хаагчийг хуулиар хүлээсэн үүргээ гүйцэтгэж байхад эсэргүүцсэн буюу хүч хэрэглэсэн гэсэн Чингэлтэй дүүргийн шүүхэд дуудагдсан боловч  хавтаст хэргийг нь хаасан юм. Хэргийг сануулахад, З.Баянсэлэнгэ нар өнгөрсөн оны арваннэгдүгээр сард Ерөнхийлөгч асан Н.Энхбаярын туслах Б.Тулгыг УМБГ-аас баривчлах үеэр Нийслэлийн прокурорын газрын хяналтын прокурор О.Мөнхбаатарын биед халдсан гэх үндэслэлээр хариуцлагад татагдаж байв. Анод” банкны удирдлага асан Н.Даваа тэргүүтэй хүмүүст Баянзүрх дүүргийн шүүхээс  хуурамч хувьцаа гаргаж бусдад онц их хэмжээний хохирол учруулсан хэрэгт тус бүр 2-5 жилийн хорих ял оноосон юм. Тэдний бусдад учруулсан хохирол 116 тэрбумд хүрчээ. “Зоос” банкийг дампууруулсан хэрэгт татагдсан  тус банкны 113 дугаар салбарын захирал Ж.Алтанцаг, Гадаад дахь төлбөр, тооцоо хариуцсан санхүүгийн албаны дарга П.Сэлэнгэ нар анхан шатны шүүхэд дуудагдсан. Н.Түвшин