Монгол Улсын иргэн 21 настай Т.Аятунгааг Интерполоор эрэн сурвалжилж эхэлсэн талаархи мэдээллийг “Шууд.мн” мэдээллийн дэлгэц уржигдар мэдээлж байсан юм. Үүний дараа  олон улсад эрэн сурвалжлагдаж байгаа Т.Аятунгаа нь загвар өмсөгч, миссийн тэмцээнд амжилттай оролцож байсан нэгэн гэх мэдээллүүд ар араасаа цацагдаж эхэлсэн. Дээрх мэдээлэлд нэр холбогдсон мисс бүсгүй өчигдөр хэвлэлийнхэнд хандаж  өөрийгөө  гэмт хэрэгтэн биш. Хүүхдээ алдсан  хохирогч гэдгээ дуулгасан. Тодруулбал, Т.Аятунгаа нь хүүхдийнхээ эцэг болох Чарльз Эдвард Эргэнтэй 2011 оны долдугаар сард Монголд танилцаж улмаар өнгөрсөн оны есдүгээр сард Филиппин улсад охин болон ээжийнхээ хамт амьдрахаар очсон байна. Тэнд охиныхоо эцэг Чарльз Эдвард Эргэн түүний найз болон туслах Эрик Финлэйн нарын хамт амьдарч байжээ.

Гэтэл Филиппинд очоод хоёр сарын  дараа эл эмэгтэйн  нөхөр охиныг нь  хулгайлжээ. Үүнээс хойш бусгүй Филиппин, Монгол хоёр улсын хууль хяналтын байгууллагад хандаж охиноо хайж эхэлсэн ч тодорхой үр дүнд хүрээгүй гэх.  Гэхдээ Т.Аятунгаа  хүүхдийг нь хулгайлж сураггүй болсон нөхөр Чарльз Эдвард Эргэн гэгчийг хаанахын иргэншилтэй, ямар ажил эрхэлдэг болохыг нь тодорхой мэдэхгүй хэмээн сэтгүүлчдэд хариулсан нь олон хүнийг эргэлзэхэд хүргэсэн юм. Бидэнд байгаа мэдээллээр Чарльз Эдвард Эргэн нь  хөрөнгө оруулалтын чиглэлээр “Жи Эн Ай”  гэх нэртэй компанитай нэгэн.  

 “Жи Эн Ай” гэх компанийн  оффис. / Жижүүрийн хэлснээр хаяа гурван гадаад хүн эл байранд ирдэг гэнэ/

Эл компани нь Сүхбаатар дүүргийн нэгдүгээр хорооны Олимпийн гудамж хуучнаар Чехийн элчингийн гурван давхарт байрладаг аж. Эх сурвалжийн мэдээллээр Чарльз Эдвард Эргэн нь Эрик Финлэйн болон Ричард Эл Соеор нартай хамтран “Жи Эн Ай” компанийг Олон улсын хэмжээнд хөрөнгө оруулалтын чиглэлээр ажилладаг гэх нэрийн дор монголчуудыг луйвардаж, гадаадаас их хэмжээний мөнгийг Монголоор дамжуулан  угаасан гээд хууль бус үйлдэлд гаршсан этгээдүүд гэнэ. Түүнчлэн Ричирд Эл Соеор нь Монголын  хошин урлагын жүжигчин бүсгүйтэй нэг жил хамтран амьдарч байгаа аж./ эх сурвалжийн мэдээллийг баталгаажуулах хүртэл жүжигчний нэрийг нууцлав/

Өдгөө Т.Аятунгаагийн хүүхдийг хулгайлсан Чарльз Эдвард Эргэн болон түүний туслах Эрик Финлэйнтэй байнгын холбоотой байх ганц эх сурвалж нь Монголын жүжигчин бүсгүйтэй хамтран амьдарч буй Ричирд Эл Соеор гэнэ. Тэрбээр одоо ч Монголд амьдарч байгаа.

Одоогоор Т.Аятунгаагийн гомдлын мөрөөр хүүхэд алга болсон хэргийг Улсын мөрдөн байцаах газрын Зохион байгуулалтай тэмцэх хэрэгтэй тэмцэх хэлтэст шалгаж байгаа юм. Гэхдээ Монголын цагдаагийн ажилтнууд Филиппин Улсад очиж түүний хүүхдийг эрэн сурвалжлах, мөрдөх ажиллагаа явуулах эрх зүйн үндэслэл байхгүй. Зөвхөн гадаад харилцааны шугамаар мэдээллээ явуулж тус улсын хууль сахиулах албаныхныг шалгаж өгөх хүсэлтийг манай талаас уламжлах гарц бий. Олон улсад эрэн сурвалжлагдаж байгаа Т.Аятунгааг Монголын хуулийн байгууллагынхан Филиппинийн  хууль сахиулах байгууллагад хүлээлгэж өгөх үү гэсэн асуулт гарч ирнэ. Тэгвэл Монгол Улсын Үндсэн хуулийн хоёрдугаар бүлэгт хүний эрх, эрх чөлөөний тухай хуульд энэ талаар зохицуулсан тодорхой заалт бий. Үндсэн хуульд зааснаар Монгол Улс өөрийн иргэнээ гадаад улсад эрүүгийн хариуцлага хүлээлгэх, гэмт хэрэгт шалгуулах, ял шийтгүүлэхээр шилжүүлэн өгөхийг хориглодог аж.

Эл хуулийн зохицуулалт  Монголоос гадна гадаадын хэд хэдэн ардчилсан оронд эл заалтыг мөрдлөгө болгож ажилладаг байна.

Харин Монголын цагдаагийн байгууллага хүүхэд хулгайлсан гэх Чарльз Эдвэр Эргэний  манайд   хууль бусаар үйл ажиллагаа явуулж буй гэх “Жи Эн Ай” гэх компани болон түүний хамсаатан Ричард Эл Соеорыг шалгахад илүүдэхгүй биз ээ.

Н.Түвшин