Авлигатай тэмцэх газрын Мөрдөн шалгах хэлтсээс өнгөрөгч долоо хоногт Монгол Улсаас ОХУ-д суугаа онц бөгөөд бүрэн эрхт Элчин сайдын үүрэг гүйцэтгэгч  Д.Идэвхтэнг дуудаж  авчран мэдүүлэг авчээ.

 Эх сурвалжийн мэдээллээр Д.Идэвхтэнг АТГ-т дуудах болсон үндэслэл нь Москва дахь манай улсын Элчин сайдын яамны хоёрдугаар байр зарагдсан, түрээслэгдсэн гэх мэдээлэлтэй холбоотой.  Сүүлийн үед Москвад байрлах Монголын Элчин сайдын яамны 10 давхар бүхий II байрыг манай эрх мэдэлтнүүд  чеченүүдэд худалдсан гэх яриа  олон нийтийн дунд түгэх болсон. Дээрх байрыг зарагдсан гэх мэдээлэлд  2005-2009 онд тус улсад улсаа төлөөлөн Элчин сайдаар сууж байсан Л.Хангайн нэр  холбогдсон юм.

Харин эл мэдээллийг албаны эх сурвалжууд няцаасан хариулт өгч байгаа. Тэгвэл энэ асуудалтай холбоотойгоор УИХ-ын Аюулгүй байдал, гадаад бодлогын байнгын хорооны дарга Ц.Цолмон, УИХ-ын гишүүн О.Баасанхүү нар ОХУ-ыг зорьсон. Тодруулбал, УИХ-ын Аюулгүй байдал, гадаад бодлогын байнгын хорооноос гадаад улс дахь Монгол Улсын Элчин сайдын яамдын төсвийн гүйцэтгэлийг хянаж, шалгах ажлын хэсэг байгуулагдсан  юм.

Тус ажлын хэсэгт УИХ-ын гишүүн О.Баасанхүү нар багтаж, ОХУ-д байгаа Монгол Улсын Элчин сайдын яамны санхүү, төсвийн гүйцэтгэлийг шалгахаар явсан. Гэвч ажлын хэсгийнхнийг уржигдар ОХУ дахь Монгол Улсын Элчин сайдын яаманд  очиход Элчин сайдын үүрэг гүйцэтгэгч  Д.Идэвхтэнг Монгол руу АТГ-аас дуудаад явсан эзэнгүй гэсэн тайлбарыг ажилтнууд нь өгсөн байна. Учир байдлыг тодруулахаар ажлын хэсгийнхэн АТГ-ын эрх бүхий албан тушаалтан руу холбогдоход “Д.Идэвхтэнг хорьж саатуулсан юм байхгүй. Удахгүй Орос руу буцаана” гэсэн байна.