Египет улсад агаарын бөмбөлгөөр аялж байсан жуулчид осолдож дотор нь байсан хүмүүс бүгд амь насаа алдсан харамсалтай хэрэг гарлаа. Бөмбөлөг Люксор хотын ойролцоо 300 метрийн өндөрт шатсан байна. Амь насаа алдсан 19 хүмүүсийн ес нь хятад, гурав нь англи, дөрөв нь япон мөн хоёр франц, нэг унгар хүн байсан гэж тус улсын эрүүл мэндийн яамнаас мэдээ ирүүлжээ. Хохирогчдын зарим нь эмнэлэгт амьд ирсэн боловч шархаа даалгүй амьсгал хураасан байна. Амь насаа алдагсдын хоёр нь бөмлөгийн нисгэгчид байжээ. Хэргийн газарт ажилласан цогцос шинжээчдийн гаргасан дүгнэлтээр амиа алдсан хүмүүсийн хоёр нь галд шатаж түлэгдээгүй байсан бөгөөд тэдгээр хүмүүс гал гарч эхэлмэгц бөмбөлгөөс үсэрсэн байжээ. Хэргийн газрын ойролцоо байсан, ослыг өөрийн нүдээр харсан гэрчүүд “Эхлээд агаарт маш хүчтэй дэлбэрэлтийн чимээ сонсогдсон, дараагаар нь хүмүүс орилолдож биднийг харж байхад өндрөөс хоёр ч хүн унасан. Харин төд удалгүй бөмбөлөг шатаж улмаар эрчтэй доош унасан” гэв. Бөмбөлгөөс унасан хүмүүс ойролцоогоор долоон давхар байшинтай тэнцэхүйц өндрөөс унасан гэж албаны хүмүүс хэлж байна. Э.Мөнхнасан