Таксины үйлчилгээ эрхлэгч хувь хүмүүсийн хариуцлагыг өндөржүүлэх болон тэдэнтэй холбоотой санал гомдол иргэдийн зүгээс их гардаг. Гэтэл хэдхэн хоногийн өмнө таксины жолооч, ахтайгаа нийлж “NBS” телевизийн захирал, сэтгүүлч С..Наранбаатарын амийг хөнөөсөн харамсалтай хэрэг гарсан бөгөөд тэднийг сэжигтнээр татан шалгаж эхэлсэн нь хувиараа такси үйлчилгээ эрхлэгчдийн хариуцлагыг өндөржүүлэх ёстойг сануулсан. Мөн бас нэг таксины жолооч хүйтэн зэвсгээр үйлчлүүлэгчээ хөнөөхийг завдсан хэрэг гарчээ. Тодруулбал, өнгөрсөн ням гаригийн орой “Хөсөгтөн” хамтлагийн ахлагч Д.Ариунболд хорооллоос гэртээ харихаар таксинд суужээ. Халамцуухан байсан тэрбээр очих газраа хэлээд дугхийж, нэг сэрэхэд нь таксины жолооч хармааг нь ухаж байсан аж. Улмаар тэдний дунд маргаан дэгдэх үеэр таксины жолооч хутга гарган ирж түүнийг хутгалсан ажээ. Одоогоор Д.Ариунболд эмчлүүлж байгаа бол таксины жолоочийг саатуулан шалгаж эхэлсэн гэнэ. Иймд Шударга өрсөлдөөн хэрэглэгчийн төлөө газраас энэ асуудалд анхаарал хандуулж ажиллахаар болсон байна. Тодруулбал, ШӨХТГ-ын дарга О.Магнай, таксины үйлчилгээ үзүүлдэг иргэдийг тодорхой зөвшөөрөл авсны үндсэн дээр үйлчилгээ үзүүлэх эрхтэй болгох гэнэ. Ингэхдээ эхлээд Стандартчилал хэмжил зүйн газраас таксины үйлчилгээ эрхлэх хүмүүст стандарт тогтоож, лиценз хэлбэрээр жолооч нарт зөвшөөрөл олгох талаар ярьж байгаа гэнэ. Тиймээс хэн дуртай нь такси үйлчилгээ эрхлэхгүй, зөвхөн зөвшөөрөл авсны дараа иргэдэд үйлчилгээ үзүүлэх эрхтэй болох юм байна. П.Наран