Онцгой байдлын албаны техник хэрэгслийн хангалтыг сайжруулж, шинэчлэлт хийх зайлшгүй шаардлагатай байгаа талаар холбогдох албаныхан мэдээлдэг. Тиймээс Онцгой байдлын асуудал эрхэлсэн байгууллагаас  Шинэчлэлийн Засгийн газрын бодлоготой уялдуулан хүн амын нягтрал, төвлөрлийг харгалзан аврах, гал унтраах  ангийн иж бүрэн барилгыг шинээр барих, байгуулах, аврах ажиллагааны автомашин, техник хэрэгслийн хангалтыг сайжруулах, аврах, шуурхай бүлгийн тоог нэмэгдүүлэхээр төлөвлөөд байгаа билээ. Тэгвэл өнөөдөр техник хэрэгслийн шинэчлэлтийн хүрээнд улсын төсвийн төсвийн хөрөнгө оруулалтаар нийт 860 гаруй сая төгрөгийн өртөг бүхий аврах ажиллагааны бүрэн тоноглогдсон гурван автомашиныг Онцгой байдлын ерөнхий газрын дарга, онцгой байдлын хурандаа Т.Дуламдорж Нийслэлийн Онцгой байдлын газрын Аврах ангийн бие бүрэлдэхүүнд гардуулан өглөө. Нэг автомашин нь 200 гаруй сая төгрөгийн өртөгтэй бөгөөд автомашин тус бүрийг ХБНГУ-д үйлдвэрлэсэн “Holmatro” фирмийн аврах ажиллагааны техник, багаж хэрэгсэл дагалдаж байгаа аж. Бүрэн тоноглогдсон аврах ажиллагааны автомашин Нийслэлийн Онцгой байдлын газрын Аврах ангид хуваарлагдаж байгаа бол дүүргүүдийн Онцгой байдлын хэлтсүүдэд аврах ажиллагааны багаж, тоног хэрэгсэл хүлээлгэн өглөө. Энэ үеэр ОБЕГ-ын дарга, онцгой байдлын хурандаа Т.Дуламдорж онцгой байдлын албанд ажилладаг аврагчдад хандан төрийн үйлчилгээг иргэдэд хурдан шуурхай, чанартай хүргэхэд анхаарч, хүн ардын эрүүл мэнд, амь нас, аюулгүй байдлыг хангах үүргээ нэр төртэй биелүүлж, автомашин, техник хэрэгслээ ариг гамтай ашиглан ажлын амжилт гарган ажиллахыг хүсэв. П.Наран