УИХ-ын Гадаад бодлого, аюулгүй байдлын байнгын хорооны дарга Ц.Цолмон, УИХ-ын гишүүн О.Баасанхүү нар Монгол Улсаас  ОХУ, ХБНГУ-д  суугаа Элчин сайдын яамдын санхүү, төсвийн гүйцэтгэлийг шалгаад ирсэн билээ. Шалгалтын  үр дүнгийн талаар  УИХ-ын гишүүн Ц.Цолмонгоос цөөн асуултад хариулт авлаа.

-ОХУ болон Герман улсад суугаа Элчин сайдын яамны санхүүд шалгалт хийсэн үр дүнгийнхээ талаар товч танилцуулбал?

-Берлин дэх Элчин сайдын яам, Москва дахь Элчин сайдын яамны төсөв, хөрөнгө оруулалтын гүйцэтгэл, зарцуулалтад хяналт тавих үүргээр ажил­лалаа.

 УИХ-аас шалгах үүрэг өгсний дагуу ажилласан юм. Герман улс дахь Эл­чин сайдын тухайд хотын төвд шинэ байр авсан юм байна. Тодорхой хуваарийн дагуу төлбөрөө төлж байгаа юм билээ. Ингэхдээ одоо ашиглаж байгаа байр нь ч Мон­голын эзэмшилд хэвээр үлдэнэ. Харин ОХУ-ын Элчин сайдын яамны тухайд гурван байр болоод нэг зуслангийн байртай.

 Манай байруу­дын нэг болох хоёр­дугаар байр нь А, В гэсэн хоёр хэсгээс бүрддэг. Үүнийх нь А хэсгийг ОХУ-ын нэгэн компани түрээслэ­дэг. Ингэхдээ түрээсийн­хээ барилгад засвар үйл­чилгээ хийхийн тулд В хэсгийг нь бас засах шаардлага гардаг шиг байна.

 Өөрөөр хэлбэл, ижил загвартай учраас адилхан засч, сайжруулах ёстой болж байгаа юм. Гэхдээ засвар, ашиглал­тын тухай гэрээ байгуу­лахдаа бол учир дутагдал­тай зүйлүүд байс­ныг нь бид Элчин сайдын яамны­ханд засч залруулах даалгаврыг өгсөн. Тэд түрээслэгч компани нь ямар хэм­жээний ажил хийсэн, түүнийх нь үнэ өртөг хэр гарсан зэргийг нь нарийн тооцох учиртай. Яг нарийн шал­галтыг нь Гадаад харил­цааны яамнаас томилогд­сон Ажлын хэсэг шалга­сан.

-Зарагдсан гэсэн  мэдээлэл гарч байсан?

-Зарим өдөр тутмын сонинд мэдээлсэн шиг ЭСЯ-ны байр зарагдсан юм алга. Тийм боломж ч байхгүй. Төрийн өмчийн хорооны шийдэх асуудал болохоос биш Элчин сайд дур мэдээд худалдах боломжгүй.

-Элчин сайд Д.Идэвхтэнг ямар үндэслэлээр АТГ-аас дуудсан юм бол?

-АТГ-аас Элчин сайд Д.Идэвхтэнг дуудаж Элчин сайдын яамны байрны асуудлаар тодруулсан юм билээ. Авлигалын хэрэгт  холбогдолгүй гэсэн тодорхойлолт гаргаж өгсөн байна лээ. Биднийг шалгалтаар очих үеэр Д.Идэвхтэн  буцаж ирээд ажилдаа орсон.

Н.Бүжин