Улсын Дээд шүүхийн хяналтын шатны эрүүгийн хэргийн өнөөдрийн шүүх хуралдаанаар Б.Анхбаяр нарт холбогдох хэргийг ялтны өмгөөлөгчийн гаргасан гомдлыг үндэслэн хянан хэлэлцлээ. Б.Анхбаяр нь 2010 оны 12 дугаар сарын 5-6-ны өдрийн хооронд өөрийн амьдарч байсан Баянзүрх дүүргийн 24 дүгээр хороо, Эрдэнэтолгойн нийтийн байрны өрөөнд танхайн сэдэлтээр иргэн Н-ийг онц хэрцгийгээр санаатай алсан, уг гэмт хэргээ нуун далдлах зорилгоор талийгаачийн цогцсыг өрөөний шалан доор газарт булж нуусан гэмт хэргийг үйлджээ. Мөн Г.Нэргүй, Д.Сүх, Б.Ууганбаяр нар нь Б.Анхбаярыг гэмт хэрэгт холбогдолгүй болгох зорилгоор 2012 оны дөрөвдүгээр сарын 9-ний өдрийн шүүхийн хэлэлцүүлэгт зориуд худал мэдүүлэг өгсөн гэмт хэрэгт холбогдсон байна. Баянзүрх дүүргийн шүүх дээрх хэргийг 2012 оны 11 дүгээр сарын 6-ны өдөр анхан шатны журмаар хянан хэлэлцээд Б.Анхбаярт Эрүүгийн хуулийн 91 дүгээр зүйлийн 91.2.2, 91.2.12 дахь хэсэгт зааснаар чанга дэглэмтэй хорих ангид 20 жил хорих ял оногдуулжээ. Харин Г.Нэргүй, Д.Сүх, Б.Ууганбаяр нарт тус бүр 2 жил 1 сар хорих ял оногдуулж, уг ялыг 1 жилийн хугацаагаар тэнсэж хянан харгалзахаар болжээ. Нийслэлийн шүүх дээрх хэргийг 2013 оны нэгдүгээр сарын 15-ны өдөр давж заалдах шатны журмаар хянан хэлэлцээд анхан шатны шүүхийн шийтгэх тогтоолд өөрчлөлт оруулж, Эрүүгийн хуулийн 91 дүгээр зүйлийн 91.1 дэх хэсэгт зааснаар 12 жил хорих ял оногдуулсан байна. Харин Г.Нэргүй, Д.Сүх, Б.ууганбаяр нарт оногдуулсан ялыг хэвээр үлдээжээ. Улсын Дээд шүүхийн хяналтын шатны эрүүгийн хэргийн шүүх хуралдаанаар дээрх хэргийг хянан хэлэлцээд Нийслэлийн шүүхийн магадлалыг хүчингүй болгож, анхан шатны шүүхийн шийтгэх тогтоолыг хэвээр үлдээв. Ингэснээр Б.Анхбаяр 20 жилийн хорих ялыг чанга дэглэмтэй хорих ангид эдлэхээр болж байгаа юм. Мөн хуралдаанаас өмгөөлөгч Б.Батхуягийг энэ хэрэгт хууль зүйн туслалцаа үзүүлж байхдаа ёс зүйн зөрчил гаргасан эсэх асуудлаар Монголын өмгөөлөгчдийн холбоонд хандахаар болжээ. Д.Цэцэг