Эрүүл мэндийн яам, Нийслэлийн ЗДТГ, түүний харьяа агентлагууд, ММСС-гийн Эрүүл мэндийн төслийн гэрээт байгууллага, Замын цагдаагийн газар зэрэг байгууллагууд хамтран Улаанбаатар хотод “Автомашингүй өдөр”-ийг дөрөв дэх удаагаа буюу энэ сарын 31-ны өдөр зохион байгуулах гэж байна. Тус өдрийг угтан энэ сарын 24-нөөс эхлэн долоо хоногийн үйл ажиллагааг зохион байгуулж байгаа бөгөөд энэ жил “Автомашингүйгээр цэвэр агаарт хамтдаа” гэсэн уриатай зохион байгуулагдах аж. Автомашингүй өдрийн зорилго нь замын ачааллыг үе шаттайгаар бууруулах, улмаар хүрээлэн буй орчин болоод нийгэмд автомашины хэрэглээнээс үүдэн учирч буй сөрөг нөлөөнд олон нийтийн анхаарлыг хандуулахад оршдог. Мөн нийтийн тээвэр, унадаг дугуй, явган зорчих зэрэг автомашинаас бусад ачаалал багатай тээврийн хэрэгслийн хэрэглээг дэмжих, мөн замын хөдөлгөөний аюулгүй байдал, нийгэмд чиглэсэн мэдээлэл сурталчилгаа явуулах юм байна. Дэлхийн олон улс оронд автомашингүй өдрийг уламжлал болгон тэмдэглэдэг бөгөөд энэ жилийн хувьд дэлхий нийтээрээ “Clean Air-it’s your move!” буюу “Цэвэр агаар-таны зорчих сонголт” гэсэн уриатай байх юм байна. Манай оронд ирэх долоо хоногийн турш явган алхалт, хөдөлгөөнийг дэмжих өдөр зам тээврийн ослоос сэргийлэх, хөдөлгөөний соёлын өдөр, гарцаар гарах өдөр гэх мэт хөтөлбөрүүдийн хүрээнд олон үйл ажиллагааг зохион байгуулах ба дүүрэг тус бүр өөрийн заасан талбайд үйл ажиллагаа явуулах аж. Тодруулбал, Чингэлтэй дүүрэг: Тусгаар тогтнолын талбайд байрлаж, Гэсэр сүмийн уулзвараас Их сургуулийн 1-р байрны уулзвар хүртэл Сүхбаатар дүүрэг: Мэдээллийн технологийн үндэсний паркын өмнөх талбайд байрлаж, Их сургуулийн 1-р байрны уулзвараас Чингис зочид буудлын уулзвар хүртэл Баянзүрх дүүрэг: Бөхийн өргөөний өмнөх талбайд байрлаж, Зүүн 4 замаас Боловсролын их сургуулийн уулзвар хүртэл Сонгинохайрхан дүүрэг: Номин их дэлгүүрийн өмнөх талбайд байрлаж, Боловсролын их сургуулийн уулзвараас Номин их дэлгүүр хүртэл Баянгол дүүрэг: Улаанбаатар их дэлгүүрийн өмнөх талбайд байрлаж, Баруун 4 замаас Номин их дэлгүүр хүртэл Хан-Уул дүүрэг: Драмын театрын урд талд байрлаж, Сөүлийн гудамжинд тус тус зохион байгуулах аж. П.Наран