Улсын бүртгэлийн ерөнхий газраас Монгол Улсын Ерєнхийлєгчийн сонгуулийн тухай хуулийн хэрэгжилт, бэлтгэл ажлыг хангахтай холбогдуулан “Иргэний баримт бичгийн зөрчил арилгах, баримт бичиггүй иргэдийг бичиг баримтжуулах сарын аян ”-ыг  уржигдраас нийслэлийн хэмжээнд эхлүүлсэн.

Тэгвэл уг аяны хүрээнд тус газар   маргааш   “Нээлттэй хаалганы өдөр”-ийг улсын хэмжээнд зохион байгуулан ажиллах гэж байна.

Маргааш тус газрын харъяа Нийслэлийн улсын бүртгэлийн газар, Иргэний бүртгэлийн газар, Хуулийн этгээдийн бүртгэлийн газар, Эд хөрөнгийн эрхийн бүртгэлийн газар болон аймаг, нийслэлийн дүүргийн Улсын бүртгэлийн хэлтэс, нэгжүүд бүрэн бүрэлдэхүүнээр ажиллана.

Энэ өдөр иргэн, эд хөрөнгө, хуулийн этгээдийн үйлчилгээ үзүүлэхээс гадна архивын лавлагаа, гадаад паспорт олгох, шинээр материал хүлээн авах  зэрэг улсын бүртгэлийн бүхий л  төрлийн  үйлчилгээ үзүүлнэ.

Мөн баримт бичгийн зөрчилтэй иргэд өөрийн оршин суугаа дүүргийнхээ хорооны улсын бүртгэгчид хандан судалгаанд хамрагдаж зөрчлөө арилгуулах боломжтой аж. Маргааш  улсын хэмжээнд бүх бүртгэлийн газрууд 10.00-16.00 цаг хүртэл иргэдэд үйлчлэх аж.

Н.Бүжин