Нийслэлийн Баянзүрх дүүргийн нутаг дэвсгэрт байрлах “Ургах наран” хорооллыг тойрсон элдэв маргаан, хэл ам тасардаггүй. Тухайлбал, оршин суугчид нь чанаргүй барилга барьсан гэсэн гомдол гаргаж өнгөрсөн жил тус дүүргийн  цагдаагийн хэлтсээс Эрүүгийн хэрэг үүсгэн шалгаж байсан. Мөн хахир өвлийн хүйтэнд зутруухан өвөлжиж, хаалт дулаан нь байнга доголдож байдаг талаар ч иргэд гомдоллодог.

Тэгвэл өвлийн турш хэл ам дагуулсан "Ургах наран" хорооллын балаг дуусахгүй байна.  Учир нь "Ургах наран" хорооллын хөрсний бохирдол хэрээс хэтэрч, орчин тойронд нь амьдардаг бусад иргэдэд ч сөрөг нөлөө үүсгээд байгааг холбогдох албанаас сэрэмжлүүлэх болов.

Оршин суугч иргэдийн гомдол, хаврын шар усны үерээс дутахгүй, цэлийж нэлийсэн муу усны балгаар Баянзүрх дүүргийн Засаг даргын Тамгын газар нэлээд завгүй хаврыг угтаж байгаа бололтой. "Ургах наран" хороолол тус дүүргийн XI хорооны нутагт оршдог. Өвлийн турш бохир усаа ил задгай асгаж, орчны газарт хөлдүү нуур бий болгосон "Ургах наран" хорооллын СӨХ-ын арчаагүй үйлдлээс болж эдүгээ оршин суугчид төдийгүй мал ахуй ч бэлчээр гарах боломжгүй болоод байгаа талаар нутгийн иргэд өгүүлж бухимдах болсон байна.

Д.Цэцэг