Шүүхийн шийдвэр гүйцэтгэх ерөнхий газрын харьяа Цагдан хорих 461 дүгээр ангид хоригдож байсан “Дижитал” хамтлагын ахлагч Баавар түлэгдсэний улмаас эмнэлэгт хүргэгдэн ирсэн юм. Түүний биеийн байдлын талаар Гэмтэл согог, судлалын үндэсний төвийн Түлэнхийн тасгийн зөвлөх эмч, клиникийн профессор Л.Тулгаас тодрууллаа.

-Дуучин Баавар хэзээ танай эмнэлэгт хүргэгдэж ирсэн бэ. Биеийн байдал нь ямар байна вэ?

-Уржигдар орой Цагдан хорих төвөөс манай эмнэлэгт хүргэгдэж ирсэн. Гал юунаас болж гарсныг бид мэдэхгүй. Баавар түлэгдэж ирээд эмчлүүлж байна. Нүүр, толгой, хүзүү, өвчүү, хэнхэлтэг, дал нуруу хэсэг, хоёр гар нь түлэгдсэн. Боолттой байна. Тайвшруулах тариа хийлгүүлсэн. Анх хүргэгдэж ирэхдээ нэлээд хөөрлийн байдалтай ирсэн. Одоо унтаж байна. Унтаж байгаа хүнийг сэрээдэггүй юм. Сайн унтуулбал шээсний гаралт нь нэмэгдэх зэргээр эмчилгээнд эерээг нөлөөлдөг.  Нэлээд гүнзгий түлэгдэлтэй.

-Эмчилгээ эхэлсэн үү?

-Эмчилгээ хангалттай хийж байгаа. Ерөнхийдөө биеийнх нь  40 хувийн түлэгдэлтэй.

 -Биеийнх нь 40 хувь түлэгдсэн байхад  эмчилгээний явцад ямар хүндрэл гарах уу?

-Хордлогод орно. Эмчилгээний үр дүнд хордлого тайлагдана. Ийм зэргийн түлэгдэлтэй хүмүүсийн 10-12 хүн нь нас барах магадлалтай гэсэн судалгаагаа бий. Яахав 35-40 хувийн түлэгдэлтэй хүний тархи, зүрх судас, өөрийн нь суурь ямар өвчтэй байна гэдгээс хамаарна. Эмчилгээ авах боломжтой.

-Өөрийгөө шатаахыг завдсан гэсэн мэдээлэл байна. Хэдийгээр хуулийн байгууллага эл асуудлыг шалгаж байгаа ч эмнэлгийн зүгээс сэтгэцийг нь шалгах боломжтой юу?

-Сэтгэцийг нь шалгуулна. Баавар унтаж байгаа учраас эмчлэгч эмч нь ярилцаагүй. Сэтгэцийн эмч нарт үзүүлэх шаардлагатай эсэхийг тогтооно. Түлэгдсэн хүн маш их өвдөлттэй байдаг учраас  ухаан санаа нь хэвийн байдлаа алддаг.

Мансууруулах бодис хэрэглэсэн, худалдахыг завдсан хэрэгт сэжигтнээр татагдан хоригдож байсан Ш.Батбаяр буюу "Дижитал"-ын Баавар  энэ сарын 23-нд буюу өнгөрөгч бямба өөрийгөө шатаахыг завдсан гэсэн мэдээлэл цацагдаад байгаа. Түүнчлэн Цагдан хорих 461 дүгээр ангид гал гарсны улмаас Бааварыг золгүй байдалд өртсөн гэх мэдээлэл ч бий. Үүнд Шүүхийн шийдвэр гүйцэтгэх ерөнхий газрын албаны эх сурвалж “Цагдан хорих 461 дүгээр ангид гал гараагүй. Ш.Батбаяр өөрийгөө шатаахыг оролдсон нь тогтоодсон” гэх мэдээллийг өгч байгаа юм. Тэгвэл гэмт хэрэгт сэжиглэгдэн цагдан хоригдож байсан хүний өрөөнд амиа хорлох оролдлого хийх боломж яагаад бүрдэв гэсэн асуултыг холбогдох байгууллагад ар гэрийхнийнх зүгээс тавих гэж  байна. Түүний ээж хэлэхдээ “Хүүхдийн биеийн байдал  тааруу байна. Чухам ямар асуудлаас болж хүү маань түлэгдсэнийг тодруулна” гэл ээ.

Сануулахад, Баавар буюу Ш.Батбаярыг Эрүүгийн цагдаагийн газар, УМБГ-ын хамтарсан ажлын хэсгийнхэн мансууруулах төрлийн бодис хэрэглэсэн байхад нь  өнгөрөгч онд саатуулж байсан юм.

Ш.Батбаярыг цагдаагийнхан саатуулсны дараа гэрт нь нэгжлэг хийхэд хар тамхины төрлийн зүйл олдсон бөгөөд тэрбээр цагдаагийнханд өгсөн мэдүүлэгтээ хар тамхи хэрэглэдэг болохоо хүлээсэн аж. Түүний гэрээс олдсон хар тамхины төрөл, зүйлийг шинжлүүлэхээр шүүхийн шинжилгээний төвд өгсөн байна. Улсын мөрдөн байцаах газрын Хар тамхи, мансууруулах бодис, хүн худалдаалах, зохион байгуулалттай гэмт хэрэг мөрдөх хэлтсийнхэн Бааварыг мансууруулах төрлийн “мөс” гэж нэрлээд байгаа бодисыг Алтай гэх этгээдээс  хоёр удаа худалдаж авсныг тогтоосон байна. Тиймээс түүнийг мансууруулах төрлийн бодис хууль бусаар олж авсан гэх үндэслэлээр шалгаж байгаа юм. Мөн гэрээс нь таблетик хэлбэртэй, эм шиг цагаан өнгийн бодис олджээ. Түүнийг мансууруулах төрлийн бодис байж магадгүй гэж үзээд шинжилгээнд өгчихсөн байгаа аж. Мансуурсан хэрэгт татагдсан Бааварыг   мансууруулах болон сэтгэцэд нөлөөлөх эм, бэлдмэл, бодисыг хууль бусаар олж авсан, хадгалсан, тээвэрлэсэн, борлуулсан гэх үндэслэлээр Эрүүгийн хуулийн 192 дугаар зүйлд зааснаар яллагдагчаар татсан шүүх хурал өнөөдөр болох байсан юм.

Баавар  өмнө нь буюу 2007 онд бусдад мансууруулах бодис зардаг Б.Рагчаабазар гэгчийн хамт  эрүүгийн цагдаагийн газарт шалгуулж байжээ.

Н.Түвшин