Засгийн газрын хэрэгжүүлэгч агентлаг Худалдан авах ажиллагааны газраас цахим худалдан авалтын системийг нэвтрүүлж, өнөөдрийн байдлаар 15 тендерийг  цахим хэлбэрээр зарлаад байгаа аж. Цахим системийг нэвтрүүлснээр нээлттэй, үр ашигтай, шудрага, ил тод байдал нэмэгдэх, тендер зохион байгуулах зардал багасах, төсвийн үргүй зардлыг хэмнэх, худалдан авах ажиллагааны хяналтыг дээшлүүлэх зэрэг олон давуу талыг бий болгосон гэнэ. Уламжлалт худалдан авах ажиллагааны үед Худалдан авах ажиллагааны газар нэг тендерийн зардалд 218.750 төгрөг, 100 тендерт 21.075.000 төгрөгийн зардал гаргадаг байсан аж. Харин цахим системийг нэвтрүүлснээр 92.57 хувийн хэмнэлт буюу нэг тендерт 16.250 төгрөг, 100 тендерт 1.625.000 төгрөгийн зардал гаргаж 20.250.000 төгрөгийн  хэмнэлт хийх боломжтой болсон байна. Тендер шалгаруулалтын явцад нэг оролцогч тендерт 226.050 төгрөг, 100 тендерт оролцоход 113.025.000 төгрөгийн зардал гаргадаг байсан бол 61.07 хувиар багасч 44.000.000 төгрөг болж 69.025.000 төгрөгийн зардал хэмнэхээр байна. Мөн тендерийн баримт бичиг худалдаж авахад 100.000 төгрөг зарцуулдаг байсан бол цахим системийг хэрэглэснээр 20.000 төгрөг буюу 80 хувийн хэмнэлтийг тендерт оролцогчдод үзүүлж байгаа аж. Эдгээр бүх тендерийн материалыг худалдаж авах, тендерийн бичиг хүргүүлэх, санхүүгийн тайлан хэвлэх зэрэг ажилд жилд дундажаар 193 тонн цаас ашигладаг байсан ба эдгээр бүх ажиллагааны нийт өртөг хоёр тэрбум төгрөгтэй тэнцдэг байжээ. Цахим систем бүрэн нэвтэрснээр Монгол банк, Үндэсний Татварын Ерөнхий газар, Улсын бүртгэлийн ерөнхий газар болон арилжааны банкны системтэй холбогдож тендерт оролцогчид бичиг баримт хэвлэх, шүүх, цагдаа, нотариат, татвар, банкны тодорхойлолт авахаар явах шаардлагагүй болсон аж. Иймд Худалдан авах ажиллагааны газрын нэг давхарт Нэг цэгийн үйлчилгээний танхим нээгдсэн бөгөөд нотариат, банк болон хууль, инженерийн холбогдох мэргэжилтэнүүд  зөвөлгөө үйлчилгээ үзүүлж, цахим системд үнэ төлбөргүй бүртгэж байгаа юм байна. Иргэд, аж ахуйн нэгжүүд худалдан авах ажиллагааны талаархи мэдээллийг авахдаа олон шат дамжлага дамжин цаг хугацаа алддаг, мэдээллийн бодит байдал зөрүүтэй, тодруулга, лавлагаа авахад түвэгтэй байсан явдлыг халж худалдан авах ажиллагааны талаарх үнэн зөв мэдээ мэдээллийн нэг дороос мэргэжлийн хүмүүсээс авах боломжтой болжээ. Тодруулбал, худалдан авах ажиллагаанд хэрхэн оролцох, цахим худалдан авах ажиллагаа болон ТБОНӨХБАҮХАТХуулийн талаар мэдээлэл, хуулийн зөвлөгөө тайлбар авах, цахим системд бүртгүүлэх, PKI код авах, тендерийн бичиг баримт худалдан авах, тендерийн материал хүлээн авах зэрэг үйлчилгээ үзүүлэх аж. Мөн Төрийн банкны салбар ажиллаж буй тул банкны бүх төрлийн үйлчилгээг үзүүлж байгаа юм байна. П.Наран