МИАТ компанийн Берлин-Москва-Улаанбаатар чиглэлийн ОМ136 аяллын Боинг 737-800 агаарын хөлөг энэ сарын 24-ний өдөр Москвагийн цагаар 20.50 цагт Монгол руу нисэх хуваарьтай байсан ч нислэг саатсан. Уг нислэг цаг агаарын таагүй үзэгдэл цасан шуурга зэрэг гэнэтийн шалтгаанаас бус хуваарьт бус техник үйлчилгээний улмаас Москва хотод  гурав хоног саатсан юм.

Москва хотын “Шереметьево” олон улсын нисэх буудал дээр нислэгт гарахын өмнө уг агаарын хөлөгт техникийн үзлэг хийх үед хөл ангийн нэг дугуйг солих шаардлага үүссэн аж. Тиймээс Улаанбаатар хотоос онгоцны нөөц дугуйг энэ сарын 25-ны Аэрофлотын онгоцоор илгээж, шаардлагатай арга хэмжээг авсан хэдий ч ОХУ-ын гаалийн дүрэм жүрам, үйл ажиллагаанаас үүдэн дугуйг гаалийн агуулахаас авч чадалгүй өнөөг хүрсэн аж. Иймд дугуй солих үйл явц нэлээн удаашрах нь тодорхой болсон тул “Шереметьево” олон улсын нисэх буудалд байгаа зорчигчдыг Улаанбаатар хотоос  нөөц онгоц явуулан авчирч байгаа юм. Өнөөдөр 10.30 цагт  уг нислэгээр саатсан 120 зорчигч эх орондоо ирлээ. Бид энэ талаар эргэн мэдээлэх болно.

П.Наран