- Зорчигчдоо шалан дээр унтуулсан МИАТ-д итгэж болох уу -

Энэ сарын 24-нд Монголын цагаар 03.50 цагт Берлинээс хөөрсөн хуваарьт нислэгт 120 гаруй зорчигчтой байсан бөгөөд уржигдар буюу 25-ны өглөө 07.30 цагт “Чингис хаан” олон улсын нисэх буудалд буух ёстой байсан.

Ийн хугацаа алдсан нь холбогдох албаны хүмүүсийн тайлбарласнаар бол нөөц дугуйг “Аэрофлот”-ын онгоцоор Улаанбаатар хотоос гуравдугаар сарын 25-нд явуулсан боловч Москва хотод очсоны дараа ОХУ-ын гаалийн дүрэм журам, үйл ажиллагаанаас шалтгаалж дугуйг гаалийн агуулахаас авч чадаагүйтэй холбоотой хэмээн тайлбарлаж байгаа юм.

Тэгвэл Москвад саатсан зорчигчдыг МИАТ компани өчигдөр Улаанбаатараас нэмэлт онгоц явуулж, өнөөдөр 10.30 цагт зорчигчид  “Чингис хаан” олон улсын нисэх онгоцны буудалд газардсан юм. Ийнхүү бид нислэг саатсан талаархи мэдээллийг албаны хүнээс авч, зорчигчидтой уулзсан юм.

МИАТ ХХК-ийн Агаарын хөлгийн завсвар үйлчилгээний хэлтсийн дарга Т.Аюуш

-Онгоцны дугуй хагарч, үүнтэй холбоотойгоор зорчигчид хоёр хоног саатлаа. Онгоцонд нөөц дугуй яагаад байхгүй байсан юм бэ?

-Онгоц болгон нөөц дугуй авч явах ёстой гэсэн заалт байхгүй. Авиа компаниудын янз бүр байдаг байх. Манайх компанийн онгоц жилийн өмнөөс нөөц дугуй авч явахаа больсон.

-Ямар шалтгаанаар нөөц дугуй авч явахаа больсон юм бол?

-Яагаад гэвэл 137 онгоц бол олон зорчигчтой авдаг. Ачааны хэсэг нь багтаамж багатай. Зорчигчдын ачаа маш их орхигдож байна, багтахгүй байна гэсэн гомдол их ирдэг. Тиймээс бид  нөөц дугуйг орхидог болсон. Онгоцны дугуй овор хэмжээ ихтэй. Тодруулбал, 170 кг жинтэй  байдаг.

-Танай компани илүү ачаа авч явахын тулд өөрөөр хэлбэл, ашиг олохын тулд нөөц дугуйгаа орхидог хэрэг үү?

-Зорчигчдын ачаа хаягдаад байна гэдэг шалтгаанаар л орхигдсон.

- Дугуй нь хагарсан онгоцоо хэзээ авчирах вэ?

- Гаалийн бичиг баримтын бүрдүүлэлт дээрээ л цаг алдаад байна. Бичиг баримт бүрдээд, багаж, тоног төхөөрөмжөө авчих юм бол нөгөөдөр гэхэд онгоц энд ирчих байна гэсэн тооцоотой байна.

-Танай онгоцонд ахиад ийм гэмтэл гарахгүй гэсэн баталгаа байна уу?

-Тэрийг хэлж мэдэхгүй. Техник юм чинь хэзээ ч гэмтэл, саатал гарч болно. Тэрийг урьдчилж харж, цаг алдалгүй засварлах хэрэгтэй гэж хэлмээр байна.

- Та бүхэнд Москвагаас ямар мэдээллийг ар гэрийнхэн чинь өгч байсан бэ?

-Аав маань Москвагаас утсаар ярьсан. МИАТ бидэнд ямар ч амралтын өрөө ч гаргаж өгөөгүй. Зөвхөн бизнес класс ангиллын зорчигчдыг буудлын өрөөнд оруулсан гэж байсан. Энэ ангилалд цөөхөн зорчигч иисдэг. Гэтэл economic ангилалд 80-100 хүн зорчдог. Тэр хүмүүсийг гаалиар нэвтрүүлэхгүй, онгоцны буудлын шалан дээр 51 цагийн турш хэвтүүлсэн байгаа юм. МИАТ энэ асуудал дээр үнэхээр хариуцлаггүй хандлаа. Миний хувьд настай эцэгтэй үнэхээр санаа зовж байлаа.

Манай томооохон компаниуд ийм хариуцлаггүй байгаад гайхаж байна. Олон улсыг төлөөлж явж байгаа компани байж яагаад нөөц дугуй авч явдаггүй юм бэ гэж асуумаар байна. Түрүүн МИАТ-ын зүгээс хариулт өгч байгаа хүн их ачаатай явдаг гэж хариулж байгааг сонслоо. Их ачаа авч явахын тулд нөөц дугуйгаа орхиж байгаа нь ашиг хийхийн нөөц дугуйгаа орхиодог байх нь гэж би хувьдаа бодож байна. Зүгээр автомашинд хүртэл нөөц дугуйтай явж байхад олон улсын нислэг үйлдэж байж ийм хариуцлаггүй байж болохгүй. Энэ 170 кг-ийн жинтэй л дугуй шүү дээ.

-Онгоцны буудал дээр нөхцөл байдал ямар байсан талаар мэдээлэл өгөөч?

-Ямар ч мэдээлэл байхгүйгээр Москва дээр хоёр өдөр өнжлөө. Онгоцны буудлын мэдээллийн самбар дээр нэг цагийн дараа, хоёр цагийн дараа ниснэ гээд л гараад байсан. Гэтэл нислэг нисэхгүйгээр үл барам 50 гаруй цаг саатлаа. Биднийг нэг өдөр нь сандал дээр унтуулсан. Хоёр дахь өдөр нь хийлдэг гудас нь дээр хоносон. Миний хувьд хэдийгээр "Аэрофлот"-ын онгоцоор өглөө 07.30 цагт "Чингис хаан" нисэх онгоцны буудал дээр ирсэн боловч ачаа маань төөрсөн тул бас л саатаад байна.  Ачаа нь одоо энэ 10.30 цагийн онгоцоор ирнэ гэсэн. Хүлээгээд байж байна.

-Иргэн Батцэцэг:

- Шереметьево дээр 53 цаг боллоо. Бие өвдөөд бууж ирлээ. Бид онгоцны буудлын шалан дээр хоёр хонолоо. Зарим нэг настай хүмүүсийг зочид буудалд буулгасан байсан. МИАТ-ийн үйлчилгээнд сэтгэл дундуур байна. Ямар ч байсан Монголдоо ирсэндээ л баяртай байна.

Ингэж нөөц дугуйгаа ачаагаар сольсноор МИАТ компани ашиг олох биш. Харин ч алдагдалд оржээ. Эх сурвалжийн мэдээлснээр “ОМ136” онгоцны дугуйг солих, зорчигчдыг Улаанбаатарт авч ирэхэд даруй 400 мянган ам. доллар буюу 560 гаруй сая  төгрөгөөр хохирсон гэнэ.

Д.Туяа

Гэрэл зургийг Б.Мөнх-Эрдэнэ