УИХ-ын гишүүн Д.Хаянхярваад АТГ-аас албан тушаалаа хэтрүүлэн ашигласан гэсэн үндэсэлээр эрүүгийн хэрэг үүсгэсэн тухай мэдээлэл  саяхнаас хэвлэлээр цацагдах болсон. Тэрбээр эл мэдээлэлд тайлбар хийсэн байна.

Одоогоор УИХ-ын гишүүн Д.Хаянхярвааг АТГ-аас сэжигтнээр татсан тогтоол танилцуулаагүй гэнэ. Тэрбээр “Би хууль зөрчөөгүй учраас шалгуулахад бэлэн.Өөрийгээ эрүүгийн хэрэгт татагдсан тухай мэдээллийг хэвлэлээс л авч байна. Албан ёсоор мэдэгдсэн юм алга” гэсэн тайлбарыг өгчээ.

Түүнийг Шадар сайд Д.Тэрбишдагвын гаргасан гомдлоор УИХ-ын гишүүн Д.Хаянхярвааг шалгаж, эрүүгийн хэрэг үүсгэсэн гэх мэдээлэл бий. Тодруулбал, Д.Хаянхярваа нь Дархан-Уул аймгийн 19 дүгээр тойрогт нэр дэвшихдээ ахмад настан болон хөгжлийн бэрхшээлтэй иргэдэд олгож буй нэг сая төгрөгийн үлдэгдлийг өөрийн нэр дэвшсэн тойрогт тараасан гэх.

 Ингэхдээ Сангийн сайдын албан тушаалаа ашиглаж 330 мянга биш, дараа олгох 340 мянган төгрөгтэй хамтатган хүн бүрт 670 мянган төгрөг олгосон тухай ч мэдээлэл цацагдаж байсан юм.

Тухайн үед ахмад настан, хөгжлийн бэрхшээлтэй иргэдэд олгох энэхүү мөнгийг Д.Хаянхярваагийн нэр дэвшсэн тойргоос бусад газарт бүрэн олгоогүй. Д.Хаянхярваагийн энэхүү үйлдэл нь сонгуулийн үеэр сонгогчдод мөнгө тараахыг хориглосон УИХ-ын сонгуулийн тухай хуулийн заалтыг зөрчсөн гэсэн үндэслэлээр хэрэг үүсгэж байсан юм.

Н.Бүжин