Улсын их хурлын Тамгын газрын Гадаад харилцаа хамтын ажиллагааны хэлтсийн зөвлөхийн албан тушаал хашиж байсан Ц.Жаргалсайхан төрийн нууц задруулсан хэргээр аавын хаалга татсан дуулиан өнгөрөгч оны турш хэвлэл мэдээллийн хэрэгслийн анхаарлын төвд байв.
Тэгвэл эрхэм зөвлөхийн араас Тагнуулын ерөнхий газрын Сөрөх тагнуулын албаны дарга асан В.Нямханд нууц задруулсан хэрэгт шалгагдаж эхэлсэн билээ. Түүнд холбогдох хэргийг хууль хяналтынхан бүтэн жилийн турш шалгасны дүнд сая нэг хяналтын шатнаас шүүх рүү шилжүүлжээ.
Хурандаа В.Нямхандыг Тагнуулын Ерөнхий газрын Мөрдөн шалгах албанаас баривчилсны дараахан Эрүүгийн хуулийн тусгай ангийн 87.2 буюу төрийн нууцад хамаарах баримт бичгийг итгэмжлэн хариуцсан төлөөлөгч задруулсан гэх үндэслэлээр буруутган шалгаж байжээ. Гэвч хавтаст хэргийг шалгах явцад хэргийн зүйлчлэл өөрчлөгдөн эх орноосоо урваж гадаадын тагнуулын байгууллагад улсын нууц баримт материал дамжуулсан гэж үзэх болсон байна.
Өөрөөр хэлбэл хуульд зааснаар Монгол Улсын иргэн тус улсын тусгаар тогтнол, үндэсний аюулгүй байдал, батлан хамгаалах хүчин чадалд хохирол учруулах зорилгоор гадаад улсын тагнуулын албанд элссэн, төрийн нууцыг гадаад улс, түүний тагнуулын албанд шилжүүлэн өгсөн, Монгол Улсын эсрэг дайсагнасан үйл ажиллагаа явуулдаг гадаад улсын байгууллагатай хамтран ажилласан гэж үзэн нотлох баримтыг үндэслэн яллах дүгнэлт үйлджээ.
Эх сурвалжийн мэдээллээр хурандаа В.Нямханд нь тагнуулын байгууллагаас халагдсаныхаа дараа тус газрын албан хаагчдын мөрддөг дотоод хууль, дүрмийг зөрчин сэжиг бүхий хүмүүстэй уулзан гадаад улс руу зорчсон гэсэн мэдээлэл ч бий. Уг нь тагнуулын ажилтан албанаасаа чөлөөлөгдсөн бол хуульд зааснаар гурван жилийн дотор гадаад руу зорчихгүй байх ёстой, хэрэв зайлшгүй шаардлага гарвал Үндэсний аюулгүй байдлын зөвлөлд илтгэх хуудас бичиж зөвшөөрөл авах ёстой юм байна. Харин В.Нямханд энэ хуулийг зөрчсөн учраас түүнийг буруутгах нэгэн үндэслэл болсон бололтой.
Тэрбээр хятадуудтай нэлээд ойр дотно байсныг нь тагнуулынхан зургаан сар мөрдөж, баримтжуулж авсан гэх мэдээлэл ч бий. Тодруулбал В.Нямханд Монголд уул уурхайн чиглэлээр ажилладаг, хятад эзэнтэй компанийн хэд хэдэн хүнтэй хоёр жил гаруй хугацаанд харилцаа холбоотой ажилласныг тагнуулынхан илрүүлсэн гэх.
Бүр тодруулбал, ашигт малтмалын орд газартай холбоотой нууцад хамаарах мэдээллийг урд хөршийнхөө найзуудад дамжуулж, 100 сая ам.долларын гэрээ хийхийг оролдсон нь нотлогдсон гэх мэдээлэл ч чих дэлсээд байна. Төрийн нууц задруулсан хэргээр шалгагдаж байгаа В.Нямханд 1997-2009 он хүртэл Тагнуулын Ерөнхий газрын Сөрөх тагнуулын албанд ажилласан. Дараа нь буюу 2009 оны долдугаар сард нийслэлийн Тагнуулын газарт томилогдон ажиллаж байхдаа “Савана” ресторанд ТЕГ-ын ажилтан хурандаа Ж-ийн цолны баярт очсон хэсэг хүмүүстэй марган зодолдсон учир үүрэгт ажлаасаа чөлөөлөгдсөн юм байна.
Юутай ч эрхэм хурандаагийн улсын нууц задруулж, эх орноосоо урвасан эсэхийг маргааш Хан-Уул дүүргийн шүүхийн эрүүгийн танхимд хэлэлцэнэ. Уг шүүх хуралд нийслэлийн Прокурорын газрын орлогч Ё.Сагсай төрийн нэрийн өмнөөс яллагчаар оролцох бол шүүгдэгчийн өмгөөлөгчөөр гавьяат хуулья Т.Жанцан эрх зүйн туслалцаа үзүүлнэ. Хурал хаалттай явагдана.
Н.Түвшин
СЭТГЭГДЭЛ БИЧИХ