Замын цагдаагийн газрын жижүүрт өнгөрсөн амралтын өдрүүдэд зам тээврийн осол хэргийн шинжтэй 200 дуудлага ирсэн байна. Ослын улмаас 23 хүн гэмтсэн бол эд материалын хохиролтой осол 64 гарсан. Согтуугаар тээврийн хэрэгсэл жолооодсон 120 зөрчлийг илрүүлэн гарч болзошгүй аваар ослоос урьдчилан сэргийллээ. Мөн дээрх хоёр өдөр согтуугаар автомашин жолоодож яваад осол гаргаж бусдын болон өөрийн эрүүл мэнд, эд хөрөнгөд хохирол учруулсан осол тав гарчээ. Тодруулбал, өчигдөр 14.00цагийн үед Сүхбаатар дүүргийн нутаг Тоосгоны эцэс орох замд Toyota Fielder 10-79 УНЛ дугаартай автомашины жолооч Д согтуугаар автомашин жолоодож, гэрлийн шон мөргөсөн юм. Жолооч Д нь 2.90 хувийн согтолттой байв. Мөн Хан-Уул дүүргийн нутаг Нисэхийн 23-920 тоот хашааны урд Hyundai Accent 78-62 УБК дугаартай автомашины жолооч Г айлын байшин мөргөсөн. Жолооч нь мөн л согтуу байсан бөгөөд 2.14 хувийн согтолттой байв. Энэ мэтчилэн согтуугаар тээврийн хэрэгсэл жолоодох, согтуу жолооч осол гаргах зөрчил буурахгүй байна.