Дууны урлагийн нэрт төлөөлөгч Монгол Улсын гавьяат жүжигчин Хайдавын Төмөрбаатарт туслах хандивын аян зохион байгуулах болсон талаар "Пентатоник" академийн тэргүүн УГЗ Б.Долгион, МУГЖ Б.Дашдондог “Sweetymotion” хамтлагийн дуучин  Э.Ганболор, альтернатив Отгоо, нар сэтгүүлчдэд мэдээлэл хийлээ.

б

Тэрбээр 1970, 80-аад оны залуучуудыг  “Бүсгүй минь чи инээмсэглэж яваарай”, “Сайн байна уу, Улаанбаатар”, “Сэтгэлийн жигүүр” зэрэг дуугаараа байлдан дагуулж байсан билээ. Гэтэл сүүлийн үед үүний амьдрал багагүй бэрхшээл тулгарч,  өөрийн гэсэн орон гэргүйгээс гадна эхнэр нь хүнд өвчтэй хэвтэрт байгаа аж.  Тиймээс урлаг соёлын одод түүнд зориулан “Цэцгийн баглаа” хандивын тоглолтыг энэ сарын 29-ний өдөр зохион байгуулахаар болжээ.

ө

Хэвлэлийн бага хурлын үеэр УГЗ Б.Долгион “Монголын нэрийг дэлхийд мандуулж явсан найзыгаа өнөөдөр ийм хэцүү амьдарч байгаад сэтгэл өвдөж байна. Цагтаа үзэгчдийг байлдан дагуулж явсан хүнээ зовсон үед нь бид мартах учиргүй. Өнөөдөр Х.Төмөрбаатар ганц ч CD гаргаагүй, 21 дууныхаа эхийг барьчихсан явна. Энэ хүний авьяас билгээр өчнөөн их баяр цэнгэлийг амсч явсан бол одоо зовсон үед нь хайртай дуучиндаа тусалцгаая” гэсэн юм.

ы

Тоглолтод  МУГЖ Т.Ариунаа, Б.Сарантуяа, С.Жавхлан, МУАЖ А. Долгор, Д.Сосорбарам зэргээс гадна рок, поп, амьд хөгжмийнхэн бүрэн бүрэлдэхүүнээрээ оролцох юм байна. Энэ үеэр МУГЖ Б.Дашдондог “Бидний гэр бүл болж, бидэнд урлагийн их тайзыг бэлдэж өгсөн МУГЖ Х. Төмөрбаатар ахдаа бүгд туслахыг уриалж байна. Төмөрөө ахын төлөө урлагийнхан бүгд цугларч гайхалтай тоглолтыг зохион байгуулж байна. Тиймээс үзэгчид тоглолтыг ирж үзэж хайртай дуучныхаа амьдралд хөрөнгө оруулаасай” гэсэн юм. Тоглолтын тасалбар 20 мянган төгрөг ба үүнээс гадна  МУГЖ Х.Төмөрбаатарт туслахыг хүссэн хүмүүс Хаан банкны 5046295993 дансанд хандив өгч болох юм байна.