Өчигдөр "Монгол бахархлын өдөр" тохиосон билээ. Энэ бахархалтай зэрэгцэн Монголын бас нэг бахархал арлын улсад алдраа дуудуулав. Мэргэжлийн сумогийн 69 дэх аварга Хакүхо Даваажаргал 32 дэх түрүүгээ авч сумогийн ертөнцөд босоо яваагаа дахин баталлаа. Тэрбээр 32 дэх түрүүгээ авснаар сумогийн бас нэгэн амжилтын эзэн болж, Тайхо аваргын дээд амжилттай зэрэгцэж ирлээ. Хакүхо энэ баярт мэдээг эх хэлээрээ тунхаглан зарлаж, сумогийн их ордонд Монгол хэлийг цуурайтуулжээ. “Бөртэ чоно, Гоо маралын удмын хүү би өөрийн хайртай Тайхо аваргын ачийг хариулж, амалснаа биелүүлж, энэ амжилтад нь хүрсэндээ, Монголын ард түмэн эвтэй байвал хүчтэй байж юманд хүрч чаддаг юм аа гэдгийг харуулсандаа туйлын баяртай байна” хэмээн хоолой зангируулан хэлсэн энэ үг дэлхийд нэртэй Монгол хүүгийн бардамнал байлаа.