Олон улсын хөгжлийн бэрхшээлтэй иргэдийн эрхийг хамгаалах өдөр өнөөдөр тохиож байна.

Энэ өдөр "Тэргэнцэртэй сайхан бүсгүй", "Тэргэнцэртэй Хувцас Загварын Шоу" наадмыг Бид чадна эм эн нэгдэл, Бриллиант Эмэгтэйчүүдийн Холбоо, Их Засаг Их Сургууль хамтран зохион байгуулна.

“Тэргэнцэртэй иргэдийн хувцас загвар”-ын шоунд тэргэнцэртэй 15 охид, бүсгүй дизайнеруудын урласан хувцасыг мэргэжлийн загвар өмсөгчидтэй хамтран үзүүлэх аж. Мөн тэд "Тэргэнцэртэй сайхан бүсгүй" тэмцээнд чөлөөт болон үндэсний хувцас өмсөн загвар үзүүлэх, шүүгчдийн асуултад хариулж мэдлэгээ шалгуулах зэргээр өрсөлдөнө.

Наадмын шилдэг оролцогч монголын анхны "Тэргэнцэртэй сайхан бүсгүй"-ээр шалгарч,  хөгжлийн бэрхшээлтэй иргэдийн элч төлөөлөгчөөр сонгогдох юм байна. Тэрбээр зохион байгуулагчдын зүгээс шилжин явах цом, Итали улсад гэр бүлээрээ амрах эрхийн бичгээр шагналыг хүртэнэ.

Мөн "Авьяаслаг", "Оюунлаг", "Төгс сайхан инээмсэглэлтэй" номинацид бүсгүйчүүдийг шалгаруулан шагнал гардуулна. Наадамд оролцогч 15 бүсгүй хоёр сарын өмнөөс бэлтгэлээ хангасан билээ.