Улсын ерөнхий прокурорын даалгавраар сэргээн шалгасан “Долдугаар сарын 1-ний” гэх тодотголтой хэргийн мөрдөн байцаалтын ажиллагаа дуусч, яллах дүгнэлт үйлдүүлэхээр нийслэлийн Прокурорын газарт шилжүүлсэн билээ. Уг хэргийн  прокурорын хяналтын хугацаа өнөөдрөөр дуусгавар  болж буй. Гэхдээ  олон арван холбогдогчтой эл хэргийг  прокурор хуулийн хугацаандаа буюу 14 хоногт багтаан хянах  боломжгүй учраас дахин хугацаа сунгаж байгаа аж. Хэрэгт холбогдсон ЦЕГ-ын даргын үүрэг гүйцэтгэгч асан, хошууч генерал Ч.Амарболд, нийслэлийн Цагдаагийн газрын дарга асан, хурандаа О.Зоригт, Хэв журмын хэлтсийн дарга асан, хурандаа Ш.Батсүх нарыг өмнө нь “Албан үүрэгтээ хайнга хандсан” гэх үндэслэлээр эрүүгийн хэрэгт татан, өршөөлд хамруулсан бол  хэргийг  сэргээн  шалгаснаас хойш тэднийг  Эрүүгийн хуулийн 294.2-т  зааснаар ”Захирагч эрх мэдэл албан тушаалынхаа байдлыг урвуулан, албаны бүрэн эрхээ хэрэгжүүлээгүйгээс онц их хэмжээний хохирол учруулсан” хэмээн үзэж, хэргийн зүйлчлэлийг өөрчилсөн  юм. Эх сурвалжийн мэдээллээр таван хүний амь үрэгдсэн хэрэгт  Эргүүл хамгааллын газрын чиглэлийн ахлах байцаагчаар ажиллаж байсан дэслэгч Ч.Ганболдод Эрүүгийн хуулийн 91-ийн 2-оор хэрэг үүсгэн яллагдагчаар татсан байна.  Түүнийг нийгмийн хэв журам  зөрчин, олон нийтийн илт хүндэтгэхгүйгээр, үл ялих шалтгаалан урьд өмнө танихгүй, хувийн өш хонзонгүй хүнд болон бусад хүнд өөрийн хүч чадалтай, давуу гэдгээ харуулах гэж хүнийг санаатайгаар алсан гэсэн зүйлчлэлээр хэрэг үүсгэсэн байна.  Ч.Ганболдод хүнийг санаатай алсан хэрэгт яллаж буй   үндэслэлээ мөрдөн байцаагч “Хэрэгт татагдсан сэжигтнүүдийн өгсөн мэдүүлгээс яллагдагчаар татах үндэслэл гарч ирсэн” гэж тайлбарлажээ. Мөн долдугаар сарын 1-ний хэрэгт нэмж яллагдагчаар татагдсан хүний нэг нь үймээний үеэр үүрэг гүйцэтгэж байсан Эргүүл хамгаалалтын газрын их эмч Г.Тунгалаг юм. Түүнд ямар зүйл ангиар ял төлөвлөж байгаа нь одоогоор тодорхойгүй. Зарим эх сурвалжийн мэдээллээр түүнийг гэмтэж бэртсэн хүмүүст эмнэлгийн анхан шатны тусламж үзүүлээгүй гэдэгт буруутгаж байгаа гэнэ. Мөн уг хэрэг Эргүүл хамгаалалтын газрын дарга асан н.Мягмаржав, тус газрын эргүүл хариуцсан байцаагч хошууч н.Мөнхбат, тусгай үүрэг гүйцэтгэгч н.Мандах нарт ч хүнийг санаатай алсан гэсэн зүйлчлэлээр шалгаж байгаа аж. Өмнө нь хэргийг хааж, өршөөлд хамруулахдаа цагдаагийн ажилтнууд галт зэвсэг хэрэглэсэн, буудсан гэдгээ хүлээсэн боловч хэний буудсан суманд хэн гэдэг хүн оногдсоныг тогтоож чадаагүй учраас хаасан байдаг. Харин хэрэг хаагдсаны дараа буюу Хэв журмын хэлтсийн дарга асан, хурандаа Ш.Батсүхийн талаар нэгэн цагдаа  "Ангийн захирагч Батсүхийг машин дотроосоо буугаар нэг хүүхдийн хэвлийд нь буудаж унагахыг харсан. Сайн бууддаг юм билээ” гэж ярьсан талаархи  тэмдэглэл олон нийтэд ил болоод байгаа юм. Ш.Батсүхийн сууж явсан эргүүлийн алаг машины баруун гадна талын баруун толь жижиг бууны мөр гарч, хагарсан байсныг Я.Хорлоорембүүчий хараад “Энэ толийг солихгүй яасан юм бэ” гэж дуу алдсан талаар бас бичсэн аж. Я.Хорлоорембүүчий нь өмнө нь долдугаар сарын 1-ний хэрэгт сэжиглэгдэн шалгагдаж байсныг энд дурдах нь илүүц буй за. Эргүүл хамгаалалтын газрын дарга асан н.Мягмаржавын хувьд 2008 оны дугаар сарын 18-ны 23,00цагт Ш.Батсүхийн хамт цагдаа нарт “Хоригдож байцаагдана. Өөрсөндөө эргэлзэж байгаа хүн байвал хэлээрэй, буунуудыг чинь янзалчихна” гэж хэлсэн баримт ч бий. Тэрхүү тэмдэглэлээр бол цагдаа нараар бууны хонгио түүлгэсэн, мөн тараасан сумаа эргүүлж авахдаа тоолж аваагүй зэрэг нь ихээхэн анхаарал татаж байна. Түүнчлэн хурандаа Ш.Батсүхийн сууж явсан УБЗ 40 59 дугаартай машины толийг солисон гээд олон баримтыг дурдсан нь хэргийг илрүүлэх гол баримт  болсон юм. Түүнчлэн УИХ-ын гишүүн Х.Тэмүүжин бууны хонгио, цагдаагийн тэмдэглэл зэргийг олон нийтэд ил болгосны дараа  Ерөнхий прокурор Д.Дорлигжав  сэтгүүлчийн асуусан “УИХ-ын гишүүн Х.Тэмүүжин сум, хонгио, дэвтэр үзүүлж, цагдаа буудсан гэдэг нь нотлогдсон гээд байгаа. Харин “Цагдаагийн ажилтан ба ар гэрийн холбоо”-ны тэргүүн Ж.Алтангэрэл үүнийг үгүйсгэдэг. Х.Тэмүүжин гишүүний гаргасан зүйл нотлох баримт болж чадах уу” гэсэн асуултад  “Энэ үймээний үеэр цагдаагийн ажилтнууд дөрвөн иргэний амь насыг буудаж хохироосон гэдэг нь хангалттай нотлогдож байгаа. УИХ-ын гишүүн Х.Тэмүүжингийн үзүүлж харуулж буйгаас илүү баримт бидэнд бий. Түүний гаргасан тэмдэглэлийн дэвтрээс ч илүү зүйл байгаа” гэсэн хариулт өгсөн. Өөрөөр хэлбэл хүний амь нас бүрэлгэсэн гэсэн зүйл ангиар хэрэгт татагдсан цагдаагийн албан хаагчдын хэрэг нотлогдсон тул тун удахгүй яллах дүгнэлт үйлдэж шүүх рүү шилжүүлэхээр зэхэж байна. Ямартай ч хэдэн он дамжсан уг хэргийг шүүх хэрхэн үнэн зөв шийдэхийг бид харах л үлдлээ. Н.Түвшин