Хүний хөгжил сангаас иргэддээ олгож буй 70 мянган төгрөгийг  хорих ангид ял эдлэж буй иргэд авч чадаж буй эсэхийг сурвалжлахыг хүссэн боловч ШШГЕГ болон холбогдох эрх бүхий байгууллагаас мэдээлэл өгөх албан тушаалтан нэгээхэн ч байсангүй. Тиймээс манай сайт Багануур дүүргийн нутаг дэвсгэр байрладаг Чанга дэглэмтэй хорих ангид ял эдлэж буй хоригдол Б-тэй ярилцаж дараахи мэдээллийг авлаа. Тэрбээр  нэрээ нууцлахыг хүссэн юм. - Ямар зүйл ангиар ял сонсоод ирсэн бэ.Чанга дэглэмтэй ангид хоригдож байгааг бодоход олон жилийн ялтай юу? - Миний нэрийг бичиж болохгүй шүү. Би эрх чөлөөгүй хүн. Энд дарамтлууна . Одоогоос хэдэн жилийн өмнө хүчингийн хэрэгт холбогдож шүүхээс ял сонсоод Багануурын Чанга дэглэмтэй хорих ангид хуваарилагдаж ирсэн. Наранд амьдарч байгаа хүмүүс их сонин ойлголттой. Торны цаана орсон л бол энэ гэмт хэрэг хийсэн гэж ойлгох юм. Үнэндээ миний хувьд найзуудтайгаа архи ууж яваад л ийм хэрэгт холбогдчихсон. Бүлэглэн хэрэг үйлдсэн гээд бүгд ял авсан шүү дээ. Тэр дотор огт хэрэг хийгээгүй залуу ч байсан. - Хорих ангийн  тань нөхцөл байдал ямар байна вэ. Ар гэрийнхнээс нь эргэлт ирж байна уу? -Манайх Улаанбаатар байдаг. Ойрхон болохоор  аав ээж эгч дүүс ирнэ. Гэхдээ эхний хоёр жил эргэлт их л ирдэг байлаа. Сүүлийн үед цайрч байгаа юм байлгүй. Ар гэрээс эргэлт ирэх нь цөөрсөн шүү дээ. Баяр ёслолын үеэр л ирдэг болж байх шиг байна. Шоронгийн нөхцөл яаж  сайхан байхав. Ямар амралтын газар биш. Манай хянагч нар ар гэрээс хүн ирэхээр гар харах нь их. Гайгүй шиг бэлэг сэлт тав арван төгрөг өгч байж хононо шүү дээ. Тэгэхгүй бол чангалаад хэцүү. -Хянагч нартаа ойролцоогоор хэдэн  төгрөг өгч байв чиний хувьд. Танай хориход яг одоо хэдэн хоригдол хүмүүжиж байгаа вэ? -Хорих ангидаа хүмүүжиж байгаа хоригдлуудын тоог хэлж болохгүй байх. Ер нь бол хүнд, онц хүнд гэмт хэрэг үйлдсэн хүмүүс л энд ирдэг юм. Хянагч нарт хэдэн төгрөг өгснөө хэлж яах билээ. -Нууцлах шалтгаан байгаа юм уу. Эсвэл та худлаа туучихав уу? - Наад асуултаа эргэлтээр ирсэн хүмүүсээс асуухад болох юм биш үү. Би худлаа ярьж яах билээ. Үнэн нөхцөл байдал нь ийм. Уг нь сард ганц удаа гэрийнхэнтэйгээ уулзахдаа хүн юм чинь жаахан ч гэсэн тухтай ганц хонож, сайхан ээжийнхээ гарын хоолыг идчихвэл нэг хэсэгтээ л сэтгэл сайхан байдаг юм. Хүн гэдэг чинь сэтгэлийн амьтан. Ялтан хүн бүр муу гэж ойлгож болохгүй. -Ингэхэд Хүний хөгжил сангийнхаа 70 мянгийг авсан уу? -Хүний хөгжил сангийн мөнгө чинь бид нарт олддоггүй юм. Уг нь  халамжаас ялтнуудын нэрийн данс руу шилжүүлсэн гэдэг юм билээ. Гэтэл би тэр мөнгөний барааг хараагүй шүү. Надаас гадна энэ хорих ангид ял эдлэж байгаа хоригдлуудын дийлэнх нь Хүний хөгжил сангаас олгодог мөнгийг аваагүй. Бид нарын нэрийн данс руу шилжүүлсэн мөнгө яахаараа алга болчихдог юм. Энэ хорих ангийн дарга нар л мэдэж байгаа байх. Би чамд өөрийнхөө мэдэж байгаа нууцыг дэлгэхэд бид нарт төрөөс өгсөн тэр  мөнгийг Багануурын хорих ангийн  хэдэн дарга нар  л завшиж унаа тэрэг, хурдан удмын адуун сүрэг худалдаж авдаг сурагтай.