Монгол улс дахь ОХУ-ын Элчин сайдын яамны байранд өнөөдөр ОХУ-ын Ерөнхийлөгч В.Путины зарлигаар  55 ахмад дайчдад Эх орны дайны 70 жилийн ойн медаль гардуулах ёслолын арга хэмжээ боллоо. Уг арга хэмжээг нээн Монгол улсад суугаа онц бөгөөд бүрэн эрхт Элчин сайд Азизов Искандер Кубарович, Монгол Улсын Батлан хамгаалах яамны Төрийн нарийн бичгийн дарга хошууч генерал З.Болдбаатар нар үг хэллээ. 

Элчин сайд Азизов Искандер Кубарович хэлэхдээ “Монгол, Орос хоёр улсын нөхөрлөлийн баталгаа болсон ахмад дайчид та бүхэндээ энэ өдрийг амрыг эрье. Хоёр улсын эрэлхэг дайчдын цусаар тамгалагдсан нөхөрлөлийн баталгаа болсон ахмадууд минь жил ирэх бүх улам бүр цөөрч байна. Гэхдээ бид та бүхэнтэйгээ цаг хугацаа алдахгүй эргэн уулзсаар байх болно. Мөн хоёр улсын харилцаа улам бүр сэргэж байгаад талархаж байна” хэмээн онцолсон юм. 

Шагнал гардуулах ёслолын ажиллагаанд ирсэн ахмадууд үр хүүхэд, ач зээ нартайгаа ирцгээсэн байсан юм. Элчин сайд Азизов Искандер Кубарович нэр дуудсан ахмадуудыг хүндэтгэн сууж байгаа газар нь очиж шагнал гардуулж байв. Зарим нь өөрсдөө зорин очиж, цэрэг хүний ёсоор ёслохыг хичээж байлаа. Чөлөөлөх дайны үед зориг хатуужилтай, эрэлхэг цэрэг байсан  тэд өдгөө хүний анхаарал халамжинд орсон ахмад буурлууд болсон ч гэлээ орос хэлээр элчин сайдтай ярилцаж, ерөөлийг үг хэлцгээж байхыг харахад бахархах сэтгэл төрж байсан юм. 

Энэ үеэр шагнал гардуулах ёслолд ирсэн ахмад дайчдаас сэтгэгдлийг нь сонсохоор хоёр буурайгийн дэргэд очиход хүү нь тэдний өмнөөс ярьсан юм. Тэрбээр хэлэхдээ “Миний аав ээж хоёр 1945 онд баруун зүүн хязгаарт тусгай үүрэг гүйцэтгэж явсан. Аавыг маань Бунийн Ёндон. Баянхонгор аймгийн Баян-Өндөр сумын харъяат.

a

Ээжийг маань Дарьцавын Сугар гэдэг. Дундговь аймгийн Дэлгэрхангай сумын харъяат. Чөлөөлөх дайнд оролцсон. Ээж маань зүүн хязгаарт 27 отрятын Төмөрбаатар даргатай заставт тусгай үүрэг гүйцэтгэсэн. Аав маань баруун хязгаарт Аюулаас хамгаалахын хурандаа Дордогийн командад мөн тусгай үүрэг гүйцэтгэсэн.

a

Аав ээж хоёр маань залуудаа хил дээр танилцаад, Монгол Улсынхаа дархан байдлын төлөө хилийн цэрэгт ажиллаж, амьдарч ирсэн. Хамтран амьдраад 53 жилийнх нь ой дээр бид Алтан хуримыг нь хийж өгсөн. 8 хүүхэдтэй, Хоёр буурай маань 91 хүрч байна” гэлээ. 

da

Харин дараа нь уулзсан ахмад дайчинг н.Чимиддорж гэдэг. Хан-Уул дүүргээс ирсэн ажээ. Тэрбээр  хэлэхдээ “Би Архангай аймгийн Хайрхан сумын харъяат. 1945 оны Чөлөөлөх дайнд оролцсон.

a

Нисэх албанд ажиллаж байсан. Иргэний агаарын тээвэрт ажиллаагүй ч  50 иад жил улс эх орондоо хөдөлмөрлөөд одоо хөгшинтэйгээ хамт үр хүүхэд ач зээтэйгээ, энх тунх амьдарч байна. Дайн гэдэг нийгмийн хамгийн муухай зүйл шүү дээ. Дайнд оролцоно гэдэг суман мөндөр, шуурган галын өөдөөс амь тэмцэн явахыг хэлдэг.

s

Хамгийн гол нь амьдрал гэдэг хэлж хэмжээлж баршгүй үнэ цэнэтэй зүйл байдаг. Тиймээс энх цагт армид алба хааж, цэрэгт явна гэдэг бол хатуужил бэрхшээлийг даван туулж эр хүн болон төлөвшихөд их чухал үүрэгтэй. Залуучуудад хандаж хэлэхэд цэргийн албанд явж өөрсдийгөө боловсруулж, эх орондоо бэлтгэл хүчин болж явахыг л захимаар байна” гэв. 

a

Монгол Улсад 1945 оны Чөлөөлөх дайнд оролцсон нийт 347 ахмад дайчин байдаг аж. Тэдгээр дайчдаас эхний ээлжинд Хан-Уул, Баянгол дүүргийн 55 ахмад дайчин өнөөдөр ийнхүү Эх орны дайны 70 жилийн ойн медалийг гардан авлаа. Харин бусад ахмад дайчдад энэ сарын 24-нд энэхүү хүндтэй шагналыг гардуулах ажээ. 

П.Наран