МУГЖ С.Жавхлан, МУГЖ Т.Баясгалан нар “Хаврын найраг” хамтарсан тоглолтоо “Монгол бөхийн өргөө”-нд тоглоод буй. Тус тоглолтын орлогоор авсан өвс, тэжээлийг Улсын онцгой комисст өчигдөр хүлээлгэн өгсөн. Энэ үеэр МУГЖ, дуучин С.Жавхлангаас дараах тодруулгыг авлаа.

-Хичнээн төгрөгөөр хэмжигдэх өвс, тэжээлийг авсан бэ?

-Тоглолтын бусад зардлыг хасаад үлдсэн бүх орлогоор энэхүү 50 машин, 100 гаруй тонн өвс, 10 машин тэжээл авсан байгаа. Тоглолт бүрээс орж ирсэн мөнгийг өвс, тэжээл рүү гаргаад байсан учраас тодорхой мөнгөн дүн хэлж мэдэхгүй байна. Хувь хүмүүсийн хандив, ЕБС-ийн сурагчдын тусламж гээд олон хүний сэтгэлээр малчдад хэрэгтэй лаа, шүдэнз, нэмнээ, хурганы уут зэрэг багагүй зүйл цугларлаа.

-Тэрбум орчим төгрөг цугларсан гэх яриа байна.

-Тэр худлаа. Гэхдээ ямар ч байсан Монголын ард түмэн бидний санаачилсан сайн үйлсийн аяныг сайхан дэмжиж, хүлээж авсанд баярлаж байна.

-Өвс тэжээлийг малчдад хүргэх ажлыг ОБЕГ хариуцаж ажиллана. Хоёр дуучин хамт явах уу?

-Монгол Улсын Засгийн газар энэхүү аяныг дэмжиж байгаа учраас бид хоёр нягт холбоотой ажиллаж зарим аймаг, суманд хамт очиж, өвс тэжээлийг хүргэе гэсэн бодол байна.

-Тусламжыг аль аймгаас эхлэх вэ?

-Тэрийг ОБЕГ шийдэх болов уу. Энэ цаг үед албан байгууллага, хүмүүс хоорондоо түнжин муутай байх шиг санагдлаа. Бас энэ сайн үйлсийн аяныг дэмжиж байгаа хүмүүс байхад дунд нь цаанаа ямар нэг санаа агуулж байгаа, одоо наад үйлдлээрээ юу хүсэж байна гэх зэргээр хий хардаж, бусниулж байгаа хүмүүс ч олон байна. Бидэнд ямар ч зорилго байхгүй. Зөвхөн малчин ард түмэнд туслах гэж хөдөлсөн юм шүү. Энэ мэтчилэн зөв зүйл рүү уухайлж байгаа залуусыг урамшуулаад өгвөл Монголд сайхан цаг ирэхэд тун ойрхон байгаа. Зарим албаны хүмүүс хэлж байсан. “Наадуул чинь тоглолтын орлогоор авсан юмыг чинь хамаатнууддаа аваачаад өгчих вий дээ” гэдгийг захиж байлаа. Тэгэхгүй гэдэгт найдаж байна.

-Хөдөө орон нутгийн тоглолт хэзээ эхлэх вэ?

-Хэд хоногийн өмнө “Илгээлтийн эзэд” аяныг эхлүүлэх гэж буйгаа мэдэгдэж байсан бол өнөөдөр ингээд аяны маань эхний үр дүн гарч байна. Орон нутгийн тоглолтыг одоохондоо ярьж шийдээгүй байгаа.

-Цаашид “Илгээлтийн эзэд” аян үргэлжлэх үү?

-Малчид маань жил бүрийн хавар хатуу болдог шүү гэдгийг санах хэрэгтэй. Залхуурч суугаад хашаа, хороогоо сайн бэлтгээгүй улмаас хохирч байгаа малчид ч байна. Тэгэхээр хаа хаанаа бодолтой байх хэрэгтэй. Энэхүү аяныг олон байгууллага дэмжиж ажиллаж байна. Тиймээс заавал бид хоёр гэлтгүй Монголоо, малчдаа гэсэн сэтгэлтэй хэн ч үүнийг санаачлаад цааш нь үргэлжлүүлээд явж болно. Зүгээр нэг жирийн хоёр дуучин нийлээд хөдлөхөд энэ бүгдийг бий болгож чадаж байна. Тэгэхээр гурван сая монголчууд нэгдэж чадвал дэлхийд гүйцэгдэхгүй юм болно. Энэ их итгэл, сэтгэлээрээ нэгдэж чадаж байхад зарим хэсэг нь талцаад бие биенийхээ ул, хөлийг шагайгаад байгаа юмаа болиоч ээ гэмээр байна. Гадаадаар нэг үг хэлээд байна. Амбиц гэж. Наад нэг муухай зүйлээ болиод, талцахаа байгаад эх орныхоо төлөө зүтгэе гэж л хэлмээр байна.

Г.Тэгшсүрэн