Монгол Улсын Соёлын Гавьяат Зүтгэлтэн, Д.Нацагдоржийн нэрэмжит шагналт зохиолч С.Пүрэв чихрийн шижин өвчнөөр өвджээ. Өвчин даамжирч гадаадад эмчлүүлэх хэрэгтэй болсон. Эмчилгээний зардалд 70 сая төгрөг шаардлагатай аж.

Чихрийн шижин өвчнийг  бүрэн анагаах боломж ОХУ, БНХАУ-д байдаг учраас  мэргэжил нэгт нөхөр зохиолчид нэгдэн хандивын аян өрнүүлжээ. Аяны хүрээнд С.Пүрэв зохиолчийг эмчлүүлэх хэмжээний хөрөнгө, мөнгө сайхан сэтгэлт хүмүүсийн хандиваар хуримтлагдсан байна. Тухайлбал, Чикаго хотод амьдардаг Монголчууд 3500 доллар, Дэнвэрт оршин суудаг Монголчууд 750 доллар, Вашингтон хотод амьдарч буй Дэлгэрцогт гэх иргэн 200 ам.доллар хандивлажээ. Мөн Герман улсын  Рэнатэ Бауве гэх иргэн 100 евро илгээсэн бол зохилч Д.Энхболд 400 мянган төгрөгийн ном борлуулсан аж.

С.Пүрэв гадаад улсад хийлгэх эмчилгээндээ маргааш явах юм байна.

Г.Тэгшсүрэн