"Монгол хүн-2020" хөтөлбөрөө барьж, фракцигүй улс төрөөр сонгуульд оролцохоо мэдэгдсэн АН-ынхан дотооддоо ойлголцолд хүрээгүй гэдгээ удаа дараа харуулах болов. Жирийн гишүүдийнхээ үгийг юман чинээ үл тоох болсон намынхаа удирдлагуудад АН-ын жирийн гишүүд олон янзаар эсэргүүцлээ илэрхийлсэн ч үл тоох нь харамсалтай. Гэвч тэд тун удахгүй сонгууль болно гэдгийг мартаагүй л баймаар. 

Тухайлбал, Дархан-Уул аймгийн Ардчилсан намын гишүүд Ардчилсан намын дарга З.Энхболдыг огцруулахаар Ардчилсан намын төв байр болон Барилгачдын талбайд гэр барьж, өлсгөлөн зарлан улс төрийн тэмцэл  хийгээд долоо хонож байна. Гишүүд Ардчилсан намын дарга З.Энхболдыг огцруулах үндэслэлээ тун товч тодорхой гаргажээ. 

Тодруулбал, Ардчилсан намын дарга З.Энхболд нь улс төрийн намын тухай хуулийн 11.1  зүйл, 21.2 зүйл болон Ардчилсан намын хяналтын хорооны 2013.11.18 өдрийн 02 тогтоол, 2014 оны аравдугаар сарын 13-ны өдрийн 03 тогтоол, дотоод сонгуулийн хорооны 2015 оны нэгдүгээр сарын 08-ны өдрийн 08 тогтоол болон намын үндсэн дүрмийг зөрчиж дүрмийн бус дарга, дүрмийн бус намын хороо, хүчингүй хоёр тамгатай Н.Мөнхдашид  Дархан-Уул аймгийн Ардчилсан намыг Н.Мөнхдаш төлөөлж төрийн сонгуульд орно гэж итгэмжлэл олгосон нь огцрох үндэслэл болно гэж үзсэн байна. 

Мөн 2004-2012 оны бүх шатны сонгуулиудад намаа ялагдуулж, 2007 оноос анхан шатны үүрүүдэд нэг ч удаа шударга сонгууль явуулаагүй, дотоод ардчилалгүй, намаа хоёр хувааж , гурван тамгатай, хоёр намын байртай болгосон дүрмийн бус намын хороо болон түүний дарга гэх Н.Мөнхдашийг “Эрх чөлөөний одон”-оор шагнасан нь мөн л огцрох үндэслэл болно гэж үзсэн аж. 

Нөгөө талаар Дархан сумын Ардчилсан намын дарга О.Баярсайханы шүдийг цөм цохиж 4.1 жил эрүүгийн хариуцлага хүлээж байсан, Аймгийн иргэдийн төлөөлөгчийн хурал дээр салаавч гаргаж хараал хэлж ёс зүйгүй авирласан Н.Мөнхдашийн нэрийг дэд сайдад дэвшүүлж байсан нь, дүрмийн бус даргатай, дүрмийн бус намын хороо, хүчингүй хоёр тамгатай намын хороогоор Үндэсний зөвлөлдөх хорооны гишүүний сонгуулийг явуулж УИХ даргын Эдийн засгийн зөвлөх н.Лхагвасүрэн тэргүүтэй Дарханы бус “Шонхор” фракцийн дөрвөн хүнийг ҮЗХ гишүүнээр сонгогдсон мэтээр ҮЗХ хуралд танилцуулж байгаа нь огцрох үндэслэл болно гэж үзсэн байна. 

Өмнө хэлсэнчлэн АН-ын дарга З.Энхболд та фракцигүй АН-ын даргын хувьд хууль бус итгэмжлэлээ хүчингүй болгох, Хууль бус ҮЗХ ны сонгуулийг хүчингүй болгох, Ардчилсан намын үндсэн дүрмийн хүрээнд Дархан-Уул аймгийн ардчилсан намын маргаантай асуудлыг шийдвэрлэхийг шаардаж тэд улс төрийн тэмцэл хийсэн ч тусыг эс олсон бололтой.

Үндсэн дүрэм болон хуулийн хүрээнд тавьсан эдгээр шаардлагыг хүлээн авахгүй тохиолдолд З.Энхболд таныг Ардчилсан намыг удирдах чадваргүй  гэж үзэж огцрохыг шаардаж байгаа юм байна.

Эх сурвалж: www.mminfo.mn