УИХ-д болон бүх шатны сонгуульд нэр дэвших хүмүүсээ улс төрийн намууд өнөөдрөөс эхлэн тодруулах учиртай. Гэсэн ч өнөөдрийг хүртэл намууд тойргоо хувааж чадаагүй, хэл ам хэрүүл маргаан даамжирсаар байгаа сурагтай.

Тухайлбал, УИХ-ын Ж.Батзандан дөнгөж сая нэр дэвшихийн тулд 100 сая төгрөг өг хэмээн нам дарамталсан тухай мэдээллийг цацсан бол, АН-ынхан фракци дамжихгүй бол тойрог өгөхгүй хэмээн зарим нэгнийг дүүрэг дүүрэг дамжуулан шидэж эхэлсэн сурагтай.

УИХ-ын гишүүн Р.Бурмаа тэдний нэг нь. Эрхэм гишүүн өнгөрсөн 2012 оны сонгуулиар намын жагсаалтаар гарч ирсэн. Харин дараа нь Дорнод аймгаас нэр дэвших гэж тус аймагт намын дарга хийж байсан Д.Цэрэнчимэг гэх бүсгүйтэй тамга тэмдэг булаалдаж багагүй маргаан дэгдээж байсан удаатай.

Тэрбээр, энэ бүхний эцэст хотын дүүрэгт нэр дэвшихээр яриа хэлцэл хийж байсан ч намын дарга хэрвээ чи “Шонхор”-т орвол Г.Батхүүг өөрчлөөд чамайг Хан-Уулд гаргаж ирье гэсэн шантааж үзүүлсэн сурагтай. Гэвч эрхэм гишүүний хувьд тойргийн төлөө фракциасаа урваж хүн чанаргүй загнахыг хүсээгүй учраас татгалзсан хариу өгч, үүний хариуд буцаад Дорнод руу шидэгджээ.

Тэгэхдээ бүр дээгүүр явсан тохирооны үр дүнд МАН-аас очих нэлээд мөнгөлөг эрхэмтэй тулчихсан сурагтай. Мөн С.Дэмбэрэл гишүүн ч адилхан Хан-Уулын тойрог авна гэсэн тохироог АН-ын даргатай хийсэн ч эцэст нь Хан-Уул ч үгүй болж Сонгинохайрхан, Чингэлтэй гэх мэтээр энд тэнд рүү шидэгдсээр Чингэлтэй дээр тогтож байгаа гэнэ шүү.

Б.Эрхэс