Олон улсын эрэн сурвалжлах сэтгүүлчдийн байгууллагын зарласан оффшор данстнуудын дунд Монголын 49 иргэний нэр дурдагдсан. Тэдний нэг нь УИХ-ын гишүүн асан, Кёкүшюзан Д.Батбаяр. Тэрбээр тухайн үед нэр дурдагдсан оффшор компани өөрт нь хамаагүй хэмээн мэдэгдэж, хуулийн байгууллагад хандаад байсан юм. Тэгвэл АТГ болон цагдаагийн байгууллага Кёкүшюзан Д.Батбаяртай нэр холбогдсон оффшор компанийг шалгаж, хариуг өгчээ. Хуулийн байгууллагын албан ёсны хариуны талаар тэрбээр мэдээлэл хийлээ.

Кёкүшюзан Д.Батбаяр:  “Оффшор данстай холбогдсон 49 иргэн Монголд байна. Энэ дунд Кёкүшюзан Д.Батбаяр миний бие багтсан байгаа. Би өмнө нь албан ёсоор та бүхэнд хэлж байсан. Арлын Япон оронд надад дөрөв, таван данс бий. Гэхдээ энэ данс бол 20 орчим жилийн өмнө барилдаж байхдаа нээсэн данс юм. Энэ данснуудаас Монгол руу мөнгө орж байсан болохоос Монголоос мөнгө гарч байгаагүй.

Сая АТГ, Тагнуулын Ерөнхий Газар, ЦЕГ зэрэг бүхий л шалгах ёстой газар шалгууллаа. АТГ-аас надад хариу ирсэн. Энэ хариунд Кёкүшюзан Д.Батбаяр хамааралгүй юм байна. Энд нэр холбогдсон Даваагийн Батбаяр гэдэг нь өөр хүн юм байна гэсэн. Тэр нь өөр хүн гэдгийг холбогдох баримтууд баталсан. Д.Батбаяр гэгч Х.Бум-Эрдэнэтэй нийлж оффшор бүсэд 2007 онд компани байгуулсан юм билээ.

Тэднийг хуулийн байгууллагынхан шалгаж байгаа гэсэн. Би нэр төрөө цэвэрлэх үүднээс шалгуулж, оффшор дансгүй гэдгээ баталлаа. Нэр холбогдсон 49 хүнээс өөрийн хүсэлтээр хандсан нь анхны хүн нь би гэнэ лээ. Тэгэхээр цаашид нэр нь илэрсэн хүмүүс бас шалгуулах нь зүйтэй юм.

Цагдаагаас ирсэн бичигт ч оффшор компаниудыг надад хамааралгүй болохыг олж тогтоосон байна. Та бүхэнд албан ёсоор мэдэгдэхэд ийм андуурал бас гардаг юм байна шүү” гэлээ.

Мөн тэрбээр УИХ-д сонгуульд АН-аас нэр дэвшихээр хүсэлтээ илэрхийлээд буйгаа сэтгүүлчдэд дуулгав. АН-ын ҮЗХ энэ сарын 27-нд хуралдаж, эцсийн шийдвэрийг гаргах юм байна.

В.Бат