Монголын шинэ үеийн утга зохиолыг үндэслэгч, зохиолч, яруу найрагч Д.Нацагдоржийн мэндэлсний 110 жил энэ онд тохиож байна. Ойн хүрээнд яруу найрагчийн төрсөн нутаг Төв аймгийн Баяндэлгэр сумын ард иргэд яруу найргийн бэсрэг наадмыг тавдугаар сарын 30-нд зохион байгуулжээ.

Дээрх наадамд оролцсон найрагчид зөвхөн тус сумын харьяат байснаараа онцлог болсон аж. Наадмын насанд хүрэгчдийн ангилалд 14 найрагч өрсөлдсөнөөс нэгдүгээр байрт С.Ууганбаяр, хоёрдугаар байранд Б.Буд, гуравдугаар байрыг яруу найрагч М.Тунгалаг нар эзэлсэн байна.  Харин ЕБС-ийн 17 сурагчаас н.Нямдулам түрүүлж, цэцэрлэгийн насны 22 хүүхдээс А.Халиун шилдгээр шалгарч, М.Мишээл хоёрдугаар байр, Г.Очирдулам гуравдугаар байр, Э.Тэмүүлэн тусгай байрын шагнал хүртжээ.

Наадмын ерөнхий шүүгчээр Монгол Улсын соёлын гавьяат зүтгэлтэн, яруу найрагч Дан.Нямаа, шүүгчээр доктор профессор, Д.Нацагдорж судлаач Ч.Жачин, тус сумын Засаг дарга Ш.Ойдов, нутгийн зөвлөлийн дарга Ө.Мягмар, “Тэмүүжин хүнс” компанийн захирал М.Түвдэндорж нар ажиллажээ.

Г.Тэгшсүрэн