1072 хувьцааны талаар Ерөнхий сайд Ч.Сайханбилэг мэдээлэл хийлээ. Тэрбээр мэдээлэлдээ:

-Засгийн газрын хуралдаан дөнгөж сая хуралдаад дууслаа.  Хуралдаанаар улс орны амьдралтай холбоотой хэд хэдэн чухал асуудлыг хэлэлцсэн. Эхний ээлжинд “Сайн хашаа” хөтөлбөрийн дүрэмд өөрчлөлт орууллаа. “Сайн хашаа” амьдралд хэрэгжихэд иргэдийн хашааны барьцаалан зээлдүүлэх газарт тавьсан асуудал их үүсч байна. Энэ дагуу журамдаа өөрчлөлт оруулсан. 10 сая хүртэл төгрөгийн зээл өгөх байсныг 15 сая хүртэл төгрөгийн зээл олгох, илүүдэл 5 хүртэлх сая төгрөгийн зээлийг дахин зээлжих бололцоог нь бий болгох чиглэлээр боловсрууллаа. Газрын гэрчилгээгээ өндөр хүүтэй барьцаалан зээлдүүлэгчээс суллаж авах бололцоог олгож байгаа. Ингэснээр “Сайн хашаа”  хөтөлбөрийн хэрэгжилтэд нэмэр болно гэж үзэж байна.

Иргэдэд олон жилийн өмнө олгосон 1072 ширхэг хувьцааг мөнгөжүүлэх асуудлыг Засгийн газар хэлэлцлээ. 2012 оны дөрөвдүгээр сарын байдлаар 2 сая 853 мянган иргэн хувьцаа эзэмшиж байснаас 278 мянган оюутан 138 тэрбум төгрөгийг,  даатгалын шимтгэл хэлбэрээр 615 мянган иргэн 4.8 тэрбум төгрөг, ахмад болон хөгжлийн бэрхшээлтэй 322 мянган иргэн 322 тэрбум төгрөг нийтдээ 1 сая 216 мянган иргэнд  464.8 тэрбум төгрөгөөр хувьцааг нь бүхэлд нь мөнгөжүүлсэн ажлыг хийсэн. Өнөөдрийн байдлаар 18 нас хүртэлх хүүхдүүдээ хасвал 1 сая 650 мянга орчим  иргэний хувьцаа мөнгөжих бололцоогоор хангагдаагүй байгаа. Үүнтэй холбогдуулаад Засгийн газраас санхүүжилтийн эх үүсвэрийг шийдсэний үндсэн дээр 1072 ширхэг хувьцааны 322 ширхэг хувьцаа буюу 30 хувьд нь 300 мянган төгрөгөөр иргэдээсээ худалдан авах саналыг Засгийн газрын зүгээс тавих шийдвэр гаргалаа. Цаана нь 750 ширхэг хувьцаа үлдэж байгаа. Үүнийг бид оны хоёрдугаар хагаст үргэлжлүүлэн худалдан авах саналыг тавьж байгаа. Иргэдийг энэ хувьцаагаа бидэнд заавал худалд гэдэг шаардлагыг Засгийн газраас тавиагүй гэдгийг хэлэхийг хүсч байна. Хэрвээ хувьцаагаа худалдах хүсэлтэй бол энэ зургадугаар сарын 13-ны өдрөөс эхлээд Улаанбаатар хот болон улс орон даяар үйл ажиллагаа явуулж байгаа арилжааны банкнуудын салбарт очиж маягт бөглөсний үндсэн дээр өргөдлөө гаргана. Үүнээс хойш 7 хоногийн дотор энэ асуудлыг шийдэх бололцоотой болно. 300 мянган төгрөгийг гурав хувааж, 100 мянган төгрөгөөр мөнгөжүүлээд явах бололцоотой гэж харж байна. Үүнд дуусах хугацаа байхгүй.  Энэ асуудлыг сонгуультай  холбож болохгүй. Бэлэн мөнгө тарааж байгаа асуудал биш. Хувьцааг нь худалдан авч, төлбөр хийж байгаа. Бүх асуудал хуулийн хүрээнд явагдаж байна хэмээлээ.

Н.Энх