Попын хатан хаан Мадонна өчигдөр “Jimmy Fallon” шоунд оролцож, ярилцлага өгчээ. Энэхүү ярилцлагыг хүргэж байна.

-Та хэдхэн жилийн дараа 60 нас хүрнэ. Энэ насан дээрээ ирсэн ч өнөөдрийнх шиг эрч хүчтэй хэвээрээ байх уу?

-Мэдээж хэрэг. Миний эрч хүч хэзээ ч дуусашгүй. Мадонна гэх хүн үхсэн цагт л энэ эрч хүч агаарт замхран алга болно. Эмэгтэйчүүд нас нэмэхээс их айдаг. Азаар би нас нэмэхээс тийм ч их айдаггүй. Нас бол тоо. Насыг зүгээр л тоо гэдгийг мэдсэн цагт чи аз жаргалыг мэдрэх болно.

-Ганц ч удаа нас нэмэхээс айж байгаагүй гэж үү?

-Чи миний нүд рүү сайн хар. Тийм сул дорой харагдаж байна уу.

-Гал асч байгаа мэт харагдаж байна?

-Одоо л зөв ярьж байна.

-Таны уран бүтээлд хил хязгаар гэж үгүй. Та дууныхаа үгийг өөрөө бичдэг. Та өөрийнхөө уран бүтээлийн санааг өөрөө гаргаж, клипийнхээ зохиолыг бичдэг. Та уран бүтээлээрээ юу илэрхийлэхийг хүсдэг вэ?

-Хүссэн бүхнийг. Залуус юу хүсч байгааг би уран бүтээлээрээ төлөөлүүлэн нийгэмд хүргэхийг хүсдэг. Уран бүтээлээр чи нийгмийг ч өөрчилж болно. Гагцхүү чи уран бүтээлдээ үнэн ч бас туйлбартай байх хэрэгтэй.

-Та Израйль болон Палестиныг нэгдэхийг уриалдаг. Ойрхи Дорнодод хяналтаа тогтоохыг санаархаж буй “Халифын вант улс” бүлэглэлийг зоригийг мохоох уран бүтээлийг хийдэг. Та мөн ижил хүйстэн, трансжендер хүмүүсийг нийгэм хүлээн зөвшөөрөхийг хүсдэг. Та тэдний төлөө дуугарч байгаа ч тэд таны төлөө хийсэн зүйл байхгүй. Энэ бүхнийг харахаар яг л зах хязгааргүй далайд аялж буй мэт?

-Би зөвхөн уран бүтээлээрээ энэ бүх асуудлыг дэлгэн харуулж байна. Тиймээ миний суусан завь хаа хүрэхийг би мэдэхгүй. Гэхдээ би улс төрийн хөшигний ард нуугдаж буй эдгээр асуудлыг хүн бүхний чихэн дээр дэлгэн тавихыг зорьж байна.

-Та энэ цагийн хүчирхэг бүсгүйчүүдийн нэг. Харамсалтай нь олны танил сэтгүүлүүд энэ оны хүчирхэг эмэгтэйчүүд жагсаалтад таныг багтаадаггүй. Энэ тухай?

-Жагсаалт эсвэл шагнал миний зорилгыг үнэлж бас мохоож чадахгүй. Жагсаалтад багтаагүй, шагнал аваагүй гэж би өрөөнөөсөө гарахгүй уйлах хүн биш. Зөвхөн сонсогчид минь над шиг бодож бас эдгээр шийдвэрлэгдэж чадаагүй асуудлыг шийдвэрлэх гарц хайдаг байгаасай хэмээн хүсч байна. Сонсогчид надтай адилхан бодолтой байна гэдэг гайхалтай. Миний зорилго мөнгө, нэр хүнд эсвэл эрх мэдэл биш. Харин надад цаг хугацаа улиран өнгөрсөн ч миний дууг үнэнчээр сонсдог сонсогчидтой байх чухал.

-Гэхдээ та бүгдийг нь биелүүлсэн. Танд бүх зүйл байна.

-Сонсогчдын минь ач гэхэд болно. Сайн уран бүтээлийг үнэлдэг хүн байдаг гэдэг гайхалтай явдал. Хэрвээ дуу хөгжим гэх зүйл өнөөдрийнх шиг өндөр түвшинд хөгжөөгүй байсан бол олон зуун хүн ажилгүй суух байсан. Тэдний нэг бол би. Би дуулж, бүжиглэхээс өөр ажил хийж үзээгүй.

-Өнгөрсөн хугацаанд Рокки та хоёрын дундах асуудал олны анхаарлыг татсан?

-Рокки надтай бус аавтайгаа амьдрахыг хүссэн. Энэ шийдвэрийг сонсоод би өөрийгөө ямар алдаа хийв гэх бодолд автсан. Хүүгийн минь асуудал намайг хүчгүй, амьгүй цогцос болгосон. Хүүгийнхээ ачаар би муу ээж гэдгээ ойлгосон.

 

-Та муу ээж гэж үү?

-Тун муу ээж.

-Рокки таныг харааж, зүхэж буйгаа олон нийтийн сүлжээгээр илэрхийлсэн. Энэ бүхэнд гомдохгүй байна гэж үү?

-Үгүй дээ энэ бүхэн миний нүдийг нээсэн.

-Та эрчүүдийг хэрхэн үнэлдэг вэ. Танд таалагдахын тулд тэр хүн ямар байх ёстой вэ?

-Мэдэхгүй юм. Тэр залуу надад таалагдахыг хүсч л байгаа бол өөрийнхөөрөө л байх хэрэгтэй.

 

-Өөрөөрөө байх. Энэ таны жинхэнэ шаардлага гэж үү?

-Чи миний хувийн амьдралыг яг л ном шиг уншихыг санаархаж байна.

-Та ихэвчлэн өөрөөсөө 20, 30 насаар дүү залуусыг сонгодог. Энэ талаар?

 

-Эрч хүч надад таалагддаг.  Амьдрал минь яг л зах хязгааргүй далай шиг.

 

-Жүжигчин  Шон Пенн та хоёрын харилцаа ямар түвшинд явна. Хэдий та хоёр салсан ч саяхнаас хамт явах харагдсан?

-Мэдэхгүй юм. Бидний харилцаа найзынх шиг л байгаа.

-Та дахин гэрлэх талаар боддог уу?

-Мэдэхгүй юм. Эмэгтэйчүүдийн амьдрал тааварлашгүй.

-Хэрвээ та хүсвэл 60 настайдаа хуримын даашинз өмсөх үү?

Мэдээж хэрэг. Ойлгомжтой асуулт байна.

-Таныг нэг үгээр илэрхийлвэл “сахилгагүй”. Энэ насан дээр өсвөр насны охин шиг аашлах ямар байдаг вэ?

-Чи намайг жүжиглэдэг гэж боддог бололтой. Уг нь миний жинхэнэ зан ааш сахилгагүй төрлийнх.

-Зарим хүмүүст таны зан ааш бүдүүлэг санагддаг?

-Надад таалагдаж байгаа зүйл бусдад таалагдах албагүй. Би ямар гоо бүсгүй эсвэл онгоцны үйлчлэгч биш. Ер нь хүн өөрөөрөө байх хэрэгтэй. Хэн нэгэнд таалагдах гэж хичээснээс болж чи өөрийгөө алдах болно. Эцэст нь хэн гэдгээ мартах болно.
 
 

Б.Дэлгэрцэцэг