УИХ-ын сонгуулийн 59,60,61,62 дугаар тойрог Сүхбаатар, Багануур дүүрэгт нэр дэвшиж буй Ардчилсан намын гишүүн Б.Мэдрээ, Х.Тэмүүжин, М.Батчимэг, Л.Гантөмөр нар өчигдөр Багануур дүүрэгт ажилласан байна. Тэднийг Багануур дүүрэгт очихдоо нисдэг тэргээр очсон гэх мэдээлэл сошиалаар тарж, уг мэдээлэл газар аваад байна.

Тиймээс дээрх дөрвөн нэр дэвшигч үнэхээр нисдэг тэрэг хөлөглөн Багануур дүүрэгт очсон эсэхийг тодруулахаар  сонгуулийн штабтай нь холбогдлоо. Тус штабын зүгээс “Нэр дэвшигчид нисдэг тэргээр сурталчилгаа хийгээгүй. Манай нэр дэвшигчид бол хөрөнгө мөнгөөр дулдуйдаж, хүч түрж байгаа нэр дэвшигчдээс тэс өөр хүмүүс шүү дээ. Өчигдөр Багануур дүүрэгт ажилласан. Гэхдээ нисдэг тэргээр яваагүй. Сошиалаар тарааж байгаа дээрх мэдээлэл бол өрсөлдөгч намын зүгээс хийж буй зохион байгуулалттай ажил бол уу. Үүгээрээ Ардчилсан намын дөрвөн нэр дэвшигчийн нэр хүндэд халдаж, иргэдэд ташаа мэдээлэл түгээх гэж оролдож байх магадлалтай” гэсэн хариулт өглөө.

УИХ-ын 59, 60, 61, 62 дугаар тойрог буюу Багануур, Сүхбаатар дүүргээс нэр дэвшигч Б.Мэдрээ, Х.Тэмүүжин, Лу.Гантөмөр, М.Батчимэг нар өчигдөр Багануурт дүүрэгт ажиллаж,  иргэд, сонгогчидтой уулзав. Үдээс өмнө Багануурын уурхай, Дулааны станцын ажилчид, төрийн албан хаагчидтай уулзан өнгөрсөн дөрвөн жилийн ажлаа тайлагнаж, ирэх дөрвөн жилд хийх ажлаа танилцуулсан нэр дэвшигчид үдээс хойш нь өөр өөрийн тойрог буюу хороодод ажиллав. Энэ бол АН-аас нэр дэвшигчдийн сонгуулийн сурталчилгаа эхэлснээс хойш Багануурын иргэдтэй хийж буй хоёр дахь уулзалт. Үүний өмнө нэр дэвшигчид Багануур дүүргээс НИТХ-д нэр дэвшсэн Б.Мөнхтулгын хамт сурталчилгааны эхний өдөр, зургаадугаар сарын 11-нд Багануур дүүргээс сонгуулийнхаа сурталчилгаагаа эхлүүлж, дүүргийн иргэдтэй уулзсан юм.

Тэд энэ удаагийн сонгуулийн ач холбогдол нь Багануур дүүрэг УИХ-д дөрвөн гишүүн төлөөлөхөөр болсныг онцлоод “УИХ-д нэг төлөөлөлтэй байх, дөрвөн төлөөлөлтэй байх хоёр асар их ялгаатай. Гэхдээ Багануур дүүргийг төлөөлж байгаа дөрвөн гишүүн дөрвүүл нэг зүгт харж байж Багануур хөгжинө шүү. Дөрвөн тийшээ харчихсан тохиолдолд дөрвөн жилий дараа бие бие рүүгээ бурууг чихээд хэрэлдээд сууж байх вий” хэмээн анхааруулж, АН-ын нэр дэвшигчдийг НИТХ-ын сонгуульд нэр дэвшигчтэй хамт багаар нь дэмжихийг уриаллаа.

Ажилчидтай хийсэн уулзалтын дараа нэр дэвшигч Х.Тэмүүжин өөрийн нэр дэвшсэн УИХ-ын 60-р тойрог буюу Багануур дүүргийн нэгдүгээр хорооны иргэдтэй уулзаж, өнгөрсөн дөрвөн жилд хийсэн ажил, шинэчлэлийн бодлогоо танилцууллаа.  

Б.САРАН

ЭХ СУРВАЛЖ: УИХ-ын сонгуульд нэр дэвшигчдийн сонгуулийн штаб