Нийслэлийн ИЗНН-ын хэсэг залуучууд Нийслэлийн Засаг дарга бөгөөд Улаанбаатар хотын захирагч Э.Бат-Үүл болон түүний баг руу, хувь хүн рүү, гэр бүл рүү нь дайрсан, гүтгэсэн нэвтрүүлгийг олон нийтийн мэдээллийн хэрэгслээр цацаж эхэллээ. Баримт нотолгоогүй уг сөрөг мэдээллийг олон нийт таатай хүлээж авахгүй байна.

Үүнтэй холбоотойгоор ИЗНН-ын дарга С.Оюун сөрөг сурталчилгаа хийж буй намынхаа залуучуудын өмнөөс уучлал гуйж, сонгуульд шударга өрсөлдөхийг уриалсан юм.

Тэрээр “Нийслэлийн ИЗНН-ын удирдлага гэх залуучууд хотын дарга Э.Бат-Үүл болон түүний баг руу дайрсан сөрөг мэдээлэл цацаж байгаад харамсаж байна. Бас эсэргүүцэж байна. Сонгуульд бодлогоороо, хийсэн ажлаараа өрсөлддөг болохоос биш явцуу сонирхолд хөтлөгдсөн сөрөг сурталчилгаагаар явж болохгүй ээ залуучуудаа. Тэдгээр залуучуудын өмнөөс уучлал гуйж байна. Хэдийгээр би ИЗНН-ын дарга ч гэсэн Э.Бат-Үүл дарга болон түүний баг өнгөрсөн дөрвөн жилд урд өмнө нь байгаагүйгээр хотыг сэтгэл гарган удирдаж, маш амжилттай ажилласан гэж дүгнэдэг. Тиймээс улс төрчийн хувьд нийслэлийн Засаг дарга болон түүний багийг дэмжиж байгаа. ИЗНН-ын хувьд өмнөх сонгуулиудад оролцохдоо хэзээ ч хувь хүн рүү дайрсан, давшилсан, магадгүй хэн нэгний захиалгат хар пиар хийдэггүй байсан. Тийм учраас манай намын нэрээр тийм нэвтрүүлэг явж байгаад би их харамсаж байгаагаа хэлье. Мөн иргэд сонгогчиддоо баримт, нотолгоогүй, гүтгэсэн сөрөг сурталчилгаанд ач холбогдол өгөхгүй байхыг уриалж, Э.Бат-Үүлийн багийг хамтдаа дэмжье” гэсэн юм.

ИЗНН-ын удирдлагууд 2016 оны сонгуульд АН-ыг дэмжин, хамтарч ажиллахаар болсон. Гэвч доод шатны буюу нийслэлийн ИЗНН-ын удирдлага гэх хэсэг залуучууд өөр бодолтой байгаа бололтой. Нэг ёсондоо ИЗНН-ын дарга С.Оюуны дүгнэж хэлсэн “хэн нэгний захиалгаар хийж байж магадгүй” гэснээс харахад түүний ард өөр ямар нэг нам, эвсэл, гуравдагч этгээд байгааг үгүйсгэхгүй юм.

Мөн дээрх асуудалтай холбогдуулан 2012-2016 онд ИЗНН-аас Нийслэлийн ИТХ-ын төлөөлөгчөөр ажилласан Г.Ганхүү байр сууриа илэрхийллээ. Тэрээр “Саяхан ИЗНН-ын нэрийн өмнөөс маш болчимгүй сөрөг сурталчилгаа гарсан. Энэ намын гишүүний хувьд тун харамсаж байна. Нийслэлд юу хийгдсэн, хийгдээгүйг хамгийн сайн мэдэх хүний нэг нь би. Яагаад гэхээр, ИЗНН-ын төлөөлж дөрвөн жил НИТХ-д АН-тай хамт ажилласан. Гэхдээ яаж ч харлуулаад, муухайгаар будаад хийсэн зүйл бол хүний сэтгэлд өөрчлөгдөхгүй шүү дээ. 2000 оноос хойш ИЗНН сонгуульд оролцож байна. Энэ хугацаанд хэзээ ч хүний гар хөл болж, бусдын эрхшээлд автаж, хар пиар хийж байгаагүй. Харамсаж байна. Тиймээс журмын нөхөддөө хандаж ийм увайгүй зүйлээ одоо зогсоо гэж хэлмээр байна. Тэдний ард МАН байгаа гэдгийг бид мэдэж байгаа. Шударга өсөлдөхийг уриалж байна” хэмээсэн юм.

  Х.Гарьд