Монгол Улсын 29 дэх Ерөнхий сайдад нэр дэвшиж буй УИХ-ын гишүүн Ж.Эрдэнэбат Ерөнхийлөгч Ц.Элбэгдоржтой уулзлаа. Ерөнхийлөгч нэр дэвшигч Ж.Эрдэнэбатад Ерөнхий сайдын чухалчлах ёстой хэд хэдэн чиглэлийг өгөв. Тухайлбал:

1.Засгийн газар ажил хийлгэсэн олон аж ахуйн нэгжид санхүүжилтийг нь өгөөгүй гэсэн гомдол их гарсан. Энэ санхүүжилтийг яаралтай олгох хэрэгтэй. Хүмүүс халамж нэхэхээсээ илүү ажил хэрэгтэй гэдгийг хэлж байна. Ингэснээр орлого нэмэгдэнэ гэж байгаа нь их зөв.

2. Орон нутгийн хөгжлийн сангийн мөнгө ирдэггүй, хөрөнгө нь жил бүр буурдаг. Стандарт тогтоож, шалгуур тавиад энэ сангийн санхүүжилтийг өмнөх жилээс багасгадаггүй байх нь маш чухал. Энэ бол орон нутагт ажлын байрыг бий болгож, иргэдийг ажилтай болгодог. Би үүнийг байнга шаардана.

3.Эрдэнэт үйлдвэрийн асуудлыг энэ Засгийн газар, УИХ нээлттэй хэлэлцэж, ярилцана байх гэж бодож байна. Ямартай ч Монголынхоо тогоонд ороод ирсэн. Одоогийн үйл явц ямар байгаа, цаашид яаж авч явах гэдгийг улсын эрх ашигт нийцүүлэн, нээлттэйгээр ярилцаж шийдэх хэрэгтэй. Тэнд ажиллаж байгаа нэг ч хүний эрх ашиг хохирох ёсгүй.

Мөн Ерөнхийлөгч ард түмэн мэдээллийн хэрэгсэл, нийтийн сүлжээгээр дамжуулан эрх баригчдын алхам бүрийг харж байгааг сануулав. Шилэн дээр явж буй учраас буруу хийсэн алхам бүр нь  ард түмний санамжинд үлдэнэ гэдгийг хэлэв. Тиймээс өөрийн эргэн тойрны хамтрагч, хамаатан садангаа татдаг төрийн албаны ёсзүйгүй байдлыг зогсоох хэрэгтэйг онцоллоо. Эрх баригчид өөрчлөгдсөн ч асуудал үлдсэн. Тэр асуудлыг шийдэх гол хүн нь Монгол Улсын Ерөнхий сайд гэдгийг онцгой анхаарч ажиллахыг Ж.Эрдэнэбатаас хүсэв.

Ерөнхийлөгчийн зүгээс маргаашдаа багтааж, УИХ-д Ерөнхий сайдын нэрийг оруулж, батлуулах чиглэлтэй байна. Мөн энэ сарын 20-ноос эхлэн Засгийн газраа бүрдүүлэх ёстойг хэлэв. Ингэхдээ сайд, дарга болох гэсэн “дурлагчид”-ыг хазаарлаж, төрийн албан хаагчдыг тогтвортой ажиллуулах нь эхний шаардлага гэдгийг анхааруулав.

В.Бат