Монголчууд ээлжит сонголтоо хийснээр төрийг залж жолоодох шинэ удирдлагууд тодорсоор байна. Өнгөрч буй өдрүүдэд төрийн томоохон томилгоонууд хийгдэж, төрийн ажил тасралтгүй үргэлжлэх боломж бүрдээд буй. Үндэсний их баяр наадмаас эхлээд Ази Европын зочдын өндөр хэмжээний уулзалтыг зохион байгуулах зэргээр төрийн шат шатны албан тушаалтан, хаагчдад амжуулах ажил олон бий. Тиймээс ч сонгуулийн дараа УИХ, Засгийн газрыг бүрдүүлэх ажил ид өрнөлөө. Өнгөрсөн өдрүүдэд хийгдсэн томоохон томилгоонуудыг тоймлон хүргэж байна.

УИХ-ын даргын овог солигдов

Парламентын дөрвөн жил улиран одож, шинэ бүрэлдэхүүн тодров. МАН олонх болсон энэ парламентыг М.Энхболд удирдахаар болсон нь хариуцлагаас зугтсан гэх хочийг түүнд үлдээв. Ялсан намын дарга Ерөнхий сайд болдог жишгийг эвдэж, тэр энэ удаа хууль тогтоох дээд байгууллагын удирдахаар болсон нь дараагийн алхамтай нь холбоотой гэж харах хүмүүс цөөнгүй байна. М.Энхболдыг 2017 онд болох Ерөнхийлөгчийн сонгуульд өрсөлдөхийн тулд Засгийн газрын тэргүүний их ажлаас зугтсан гэж үзэж буй.

Парламентад олонх болсон намын дарга ялснаар спикерийн овог л солигдов. УИХ дахин дөрвөн жил Энхболд гэсэн даргатай хууль тогтоол батлах нь. Дараагийн Энхболдын баг хэрхэн ажиллах нь олны нүдний өмнө ил бий. Тиймээс ч олон нийт тун удахгүй эхний  үнэлгээгээ өгнө.

Залуухан Ерөнхий сайд

Монгол Улсын 29 дэх Ерөнхий сайдаар Ж.Эрдэнэбат томилогдов. Ерөнхий сайд асан Ч.Сайханбилэгийн Сангийн сайдаар ажиллаж байсан түүнийг үнэлэх хүмүүс цөөнгүй бий. Эдийн засгийн хүнд хэцүү цагт төрийн санг удирдаж, парламент болоод олон нийтийн үнэн зөв мэдээллээр хангасан, мэдлэг мэдээлэлтэй сайтай гэхчлэнгээр түүнийг томилох үед таатай үг цөөнгүй сонсогдож байсан.

Шинээр бүрэлдэн бий болсон парламент болоод Ерөнхий сайдын томилгооноос харвал монголчууд залуу үедээ итгэл хүлээлгэдэг болжээ. Залуухан Ерөнхий сайд Ч.Сайханбилэгийн араас үе тэнгийн бас нэг залуу орж ирсэн нь таалах зүйлсийн нэг яах аргагүй мөн. Товчхондоо төрд 70-аад оныхны үе эхэлжээ.

Ж.Эрдэнэбатын мэргэжлийн гэж тодорхойлсон Засгийн газар энэ сарын 20-ноос бүрдэх ёстой. Түүний багт хэн хэн ажиллах нь одоогоор таамаг төдий байна.

Гаднаас орж ирсэн хотын дарга

1990 оноос хойш түүхэндээ анх удаа нийслэлийн Засаг даргаар “гадны” хүнийг томилов. Нийслэлчүүдийн сонголтоор орж ирээгүй, төлөөлөгч бус энэ хүн нь УИХ-ын гишүүн асан Су.Батболд байв. Нийслэлд ялалт байгуулсан намын дарга хотыг удирддаг жишгийг мөн л “зөрчиж” орж ирсэн түүнд улстөрчийн туршлага арвин бий. Харин хот гэх их айлыг удирдах аж ахуйн ажлын туршлага бий эсэхийг нийслэлчүүд удахгүй харна. Хотын дарга Су.Батболд багаа зарчимч, шударга хүмүүсээр бүрдүүлнэ гэдгээ хэлсэн. Мөн дөрвөн орлогчийг хоёр болгон багасгах мэдээлэл бий.

Түүнтэй хамтран нийслэлийг удирдах хүн нь Ц.Сандуй. 60 тэрбумын асуудлаас болж хотын захирагч болох эрхээ алдсан Ц.Сандуй НИТХ-ын дарга болсон.  Тэрбээр нийслэлийн төлөө хоёргүй сэтгэлээр ажиллахаа томилгооны өдөр индрээс хэлсэн. Ам, ажил хоёр хэрхэн нийлж, нийцэхийг бид мөн л харж, анзаарч буй.

АТГ даргатай боллоо

Хоёр сарын өмнө дарга Д.Ганболд нь өөрийн хүсэлтээр ажлаа өгч, суудлаа орхисноос хойш тус байгууллага “эзэнгүй” байсан. Уг нь Ерөнхийлөгч томилгоог шуурхайлж, орны хүнийг оруулж ирсэн ч З.Энхболдын парламент гацаасан. Магадгүй сонгуулийн өмнө элдэв асуудал үүсэхээс сэргийлэх арга нь АТГ-ын даргын томилгоог гацаах байсан биз.

Харин М.Энхболдын парламентын шуурхайлж хийсэн томилгоонуудын дунд АТГ газар багтаж, даргатай болов. Тус байгууллагыг Цагдаагийн Ерөнхий газрын Мэдээлэл технологийн төвийн даргаар ажиллаж байсан Х.Энхжаргал удирдахаар болов. Томилгоог хэлэлцсэн УИХ-ын гишүүд АТГ-ыг айлган сүрдүүлдэг бус соён гэгээрүүлдэг байгууллага болгох захиасыг түүнд өгсөн билээ.

В.Бат