УИХ-ын чуулганы нэгдсэн хуралдаанаар сайд нарын томилгоог үргэлжлүүлэн хэлэлцэж байна. ЗГХЭГ-ын даргаар УИХ-ын гишүүн Ж.Мөнхбатыг томилох саналыг  Ерөнхий сайд Ж.Эрдэнэбат танилцуулсан юм. Хэлэлцэж байгаа асуудалтай холбогдуулан гишүүд асуулт тавьж, үг хэлж байна. УИХ-ын гишүүн Д.Эрдэнэбат:

-Энэ Засгийн газар эрээвэр хураавар байна. Дөрвөн сайдаа оруулж ирсэнгүй. Дөрвөн сайдтай холбоотой нийгэмд олон янзын уур амьсгал байна. Хэзээ 4 сайдынхаа нэрийг оруулж ирэх юм бэ. АТГ 4 сайдыг нэр дэвшүүлэхийг түдгэлзүүлсэн гэлээ. Яг ямар хариуг АТГ өгсөн юм. МАН амлалтаасаа буцлаа. Мэргэжлийн Засгийн газар чинь компаниудын хоорондын мөнгөний тэмцэл явууллаа.  “Давхар дээл”-гүй байна гэдэг амлалт чинь үгүй боллоо.

Нэр дэвшигчид Ж.Мөнхбатад “Засгийн газар сэтгэлийн хөөрлөөр ажилладаг газар биш. Засгийн газар улстөр биш. Аливаа асуудалд хандахдаа төрийн сайдын нэрийн өмнөөс ажиллаарай. Төрийн ноён нуруу хэрэгтэй. Их зүйл сурах байх. МАН шилдэг боловсон хүчинтэй гэж ард түмэн та нарт санал өгсөн. Та бүхэн энэ сонголт руу их богино хугацаанд ус цацлаа. Гэхдээ ард түмний сонголтыг хүндэтгээд та бүхэнд амжилт хүсье.

Ерөнхий сайд Ж.Эрдэнэбат:

-Үлдсэн 4 сайдаа хуулийн хүрээнд  Монгол Улсын Ерөнхийлөгчтэй дахин зөвшилцөөд дахин оруулж ирнэ.  Үлдсэн дөрвөн сайдад АТГ-аас “тухайн албан тушаалыг хашихад хувийн ашиг сонирхол байна” гэсэн бичиг ирүүлсэн.

УИХ-ын гишүүн Т.Аюурсайхан:

-Бид эрүүл шүүмжлэлийг үзэн яддаг байж болохгүй. Эрүүлээр үг хэлэх боломжийг нь олгосноор алдааг давтахгүй хөгжлийн суурь болдог. 15 сайдын нэрийг оруулаад өнөөдөр томилох их итгэлийг ард түмэн олгосон. Бусад улс төрийн намын гаргасан алдааг давтахгүй, тулхтай, туршлагатай нам гэдгээ үлгэр жишээчээр харуулах хэрэгтэй.

Чуулганы хуралдаан үргэлжилж байна.

Н.Энх