Ардчилсан намын гишүүд сонгуулийн маргаантай асуудлаар мэдээлэл хийлээ. Тус хуралд Ардчилсан намын гүйцэтгэх зөвлөлийн гишүүн С.Эрдэнэ, тус намын хяналтын ерөнхий хорооны нарийн бичгийн дарга Б.Батхуяг нарын хүмүүс оролцов.

Ардчилсан намын гүйцэтгэх зөвлөл хуралдаж сонгуультай холбоотой маргаан, хэрэг зөрчлүүдийг судлах, дүгнэлт хийх, хууль хяналтын байгууллагад шилжүүлэх зорилгоор өнгөрсөн сард онцгой комиссыг байгуулжээ. Тус байгууллагын хяналтаар 2016 оны УИХ-ын болон аймаг, нийслэлийн ИТХ-ын сонгуулиар гарсан олон зөрчил илэрч байгаа талаар тэд мэдээлэв.

Комисс байгуулагдсанаас хойш 200 гаруй өргөдөл, гомдол иржээ. Эдгээр гомдлын ноцтой зөрчил маргааныг тус намын хяналтын ерөнхий хорооны нарийн бичгийн дарга Б.Батхуяг танилцуулав. Түүний хийсэн мэдээллийг бүрэн эхээр хүргэж байна.  

• МАН-ын санхүүжилт босгох 60 тэрбумын асуудал. Энэ асуудлаар Ардчилсан намын удирдлагууд Улсын ерөнхий прокурор, АТГ-т албан бичиг хүргүүлсэн. Сонгууль дуусаад сар гаруй хугацаа өнгөрөхөд дээрхи асуудалд ямар нэгэн хариу ирүүлээгүй.
   

• СЕХ-ны удирдлага сонгуулийг будлиантуулсан байж болзошгүй. Сонгогчын тоогоор хэвлэж тараасан саналын хуудас 21 аймаг 9 дүүрэгт бүрэн хүргэсэн гэсэн боловч сонгуулийн өдөр дутуу саналын хуудас хүргэгдсэн байсан. Үүний дараа саналын хуудсыг хэвлэж санал авах захиргааны акт гаргасан. Дараа нь тус актаа цуцалсан.

• УИХ-ын гишүүн Х.Болорчулуун мөнгө тараасан: УИХ-ын сонгуулийн 14 дүгээр тойрогт МАН-аас нэр дэвшигч Х.Болорчулуун мөнгө тараасан хэргийг хууль хяналтын байгууллагаар шалгуулна. Түүний энэ  үйлдлийг тогтоосон бичлэгийг цагдаагийн байгууллагад хүргүүлсэн.

• УИХ-ын сонгуулийн 23 дугаар тойрогт МАН-аас нэр дэвшигч Л.Энхболдын сонгуулийн хууль зөрчсөн үйлдлийг цагдаагийн байгууллагаар шалгуулна.

• УИХ-ын сонгуулийн 33 дугаар тойрогт нэр дэвшигч Ч.Хүрэлбаатар сонгогчдод мөнгө тараасан.

• УИХ-ын сонгуулийн 46 дугаар тойрогт нэр дэвшигч О.Содбилэг мөнгө тараасан асуудал хууль хяналтын байгууллагаар шалгагдаж байгаа. Энэ асуудлыг бид үргэлжлүүлэн шалгуулна.

• МАН-аас нэр дэвшигч Д.Дамба-Очир Орхон аймагт нэр дэвшихдээ мөнгө тараасан. Энэ үйлдэл нь баримттайгаа хууль хяналтын байгууллагад хүргэгдсэн. Эрүүгийн анхан шатны шүүхээс мөнгө тараасан нь нотлогдсон шийдвэр гарсан.

• УИХ-ын 49 дүгээр тойрогт МАН-аас нэр дэвшигч Д.Оюунхорол мөнгө тараасан асуудлыг ул суурьтай шалгуулна. Энэ асуудал БЗД-ийн эрүүгийн хэргийн шүүхээр ороод 5 хүн мөнгө авсан гэдгээ хүлээн зөвшөөрөөд мэдүүлэг өгсөөр байтал давж заалдах шатны шүүхээс мөнгө тараагаагүй гэдэг шийдвэр гарсан. Үүнийг дахин шалгуулна.

• УИХ-ын 70 дугаар тойрогт МАН-аас нэр дэвшигч Д.Лүндээжанцан сонгуулийн хууль тогтоомж зөрчсөн. Бусдын нэр төрд халдсан олон зөрчлийг нь шалгуулахаар БЗД-ийн цагдаагийн байгууллага болон эрүүгийн шүүхэд хандсан байгаа.

• Үндсэн хуулийн цэцэд маргаан гаргасан. Сонгуулийн шилжилт хөдөлгөөнийг сонгуулийн дүнд нөлөөлөх зорилгоор зохион байгуулсан гэж бид үзэж байгаа. Долоон нэр дэвшигчтэй холбоотой, 3500 хүртэл сонгогчыг шилжүүлэн байршуулсан нь сонгуулийн дүнд нөлөөлсөн гэдэг шалтгаанаар бид ҮХЦ-д өсгөн. ҮХЦ үүн дээр хэрэг үүсгэн шалгаж байгаа.

Маргаантай хэмээн үзэж буй дээрхи асуудлуудаар тус намын удирдлагууд хууль, хяналтын байгууллагад хандаж, цаашид үргэлжлүүлэн хяналтын үйл ажиллагаа явуулахаа мэдэгдлээ.

Хэвлэлийн хурлын үеэр гүйцэтгэх зөвлөлийн гишүүн С.Эрдэнэ “Ардчилсан намын  сонгуулийн дараагаар Ерөнхий сайд болон шинээр томилогдож байгаа аймгийн Засаг дарга нарын хууль зөрчсөн үйлдлүүдийн талаар мэдээлэл хийсэн юм. Тэрбээр   “Ноцтой үйлдэл гэвэл Увс аймгийн Засаг даргаар томилогдсон Д.Батсайхан гэгч нь эрүүгийн хэргийн шүүхээр ороод Эрүүгийн хуулийн 263 дугаар зүйл буюу өршөөлд орохгүй зүйл ангиар ял шийтгэлтэй байгаа. Гэтэл ийм хүнийг Засаг даргаар томилсон Ерөнхий сайдын захирамж нь хууль зөрчсөн байна” хэмээв.

Г.Тэгшсүрэн