“Аз жаргалтай хот” хөтөлбөрийн хүрээнд Улаанбаатар хотын Захирагчийн ажлын албанаас "Шарилжгүй улаанбаатар" аяныг дөрөв дахь жилдээ зохион байгуулж байна. Тус аяны нээлт өнөөдөр 09.00 цагт болж ТҮК-ийн ажилчид болон 500 гаруй оюутан шарилж хадах ажлыг  эхлүүллээ.

Аяны хүрээнд 500 гаруй оюутан түр ажлын байраар хангагдаж, нийслэл хотын гудамж талбайд ургасан шарилж болон хог хаягдлыг цэвэрлэх юм байна. Мөн Нийтийн үйлчилгээний Улаанбаатар нэгтгэл ОНӨААТҮГ, төвийн 6 дүүргийн ТҮК, ногоон байгууламжийн чиглэлээр гэрээгээр ажил гүйцэтгэдэг 20 хувийн хэвшил, ТББ-ын 695 хүн ажил гүйцэтгэх ажээ.

Тэд Дунд голоос гурвалжингийн гүүр, Эх нялхсын урд болон арын уулзвараас Саппоро хүртэл мөн Сэлбэ гол дагуу нийт 424 мянган метр квадрат газрын шарилжийг агротехнологийн горимын дагуу хадаж, зөөх ажлыг зохион байгуулах юм байна.

Шарилж хадах ажлыг ЗЦГ-ын уулзвар /Дунд гол/-ын орчмоос  43 хадагч машин, 111ш гар хадуур, 100ш тармуур, 100 гаруй хайч багаж хэрэгсэлтэйгээр эхлүүлжээ.

Г.Тэгшсүрэн