Браизилын Рио хотноо зуны Олимпийн наадмын 31 дүгээр наадам үргэлжилж байна. Манай улс энэ удаагийн Олимпийн наадамд 43 тамирчны бүрэлдэхүүнтэйгээр оролцсон нь түүхэн амжилт байлаа. Тэгвэл манай тамирчдын тэмцээн уралдаан бараг өндөрлөж байна.

Өнөө, маргааш хоёр өдөр чөлөөтийн эрэгтэй 5 тамирчин барилдаанаа хийнэ. Марафон гүйлтэд Б.Сэр-Од мөн гүйх учиртай. Ингэснээр манай тамирчид тэмцээнээ бүрэн дуусгаж, дүнгээ тавиулах юм. Тэр болтол бидний найдлага дуусах болоогүй.

Харин сүүлийн хоёр өдөр чөлөөтийн эмэгтэй тамирчид барилдаанаа хийж дуусгалаа. Дэлхийд хамгийн хүчтэй өрсөлдөгчдийн тоонд зүй ёсоор багтдаг манай эмэгтэй чөлөөтийнхөн энэ удаад F дүн авахаар оролцлоо. Энэ бол муулж байгаа хэрэг биш. Манай тамирчид Лондоны Олимпийн наадамд оролцож байснаасаа хойш чансаа бараг л ахиагүй, ур чадвар дээшлээгүй, сэтгэл зүй дутуу байгаа нь харагдлаа гэж дүгнэх гээд байна.  Дэлхийн том том бөхчүүдтэй чадлаараа сайхан үзэж, ялж, ялагдаж байгаа тамирчдаа бид битгий хэл нь дүгнэх эрхгүй ч байж болох. Гэхдээ л бас чанар чансаагаа арай л жаахан дээшлүүлмээр байна шүү дээ, энэ чинь.

Бид Лондоны Олимпийн наадамд эмэгтэй чөлөөтийнхнөөс С.Батцэцэгт л илүү их найдаж байсан. Тэр ч монголчуудын итгэл найдварыг алдалгүй хүрэл медаль авсан. Тэгвэл Риод ч бас энэ байдал өөрчлөгдсөнгүй. Хамгийн том найдлага С.Батцэцэг л байлаа. Мэдээж П.Орхон, О.Насанбурмаа, Э.Сумъяа нарт тодорхой хэмжээнд найдалгүй яахав. Гэхдээ л хамгийн том найдлага нь С.Батцэцэг. Ингээд бодохоор Лондоны олимпийн наадмаас хойшхи дөрвөн жилийн циклд нэг их өөрчлөлт ороогүй гэж дүгнэж болохоор байгаа биз дээ.

Дээрээс нь манайханд нэг л зүйл дутуу байна. Иргэдийн цахим хуудас, фэйсбүүкээр бухимдаад байгаа шиг дайчин чанар дутуу байгаа нь үнэн. Мэдээж барьцаа аваад, үнэлгээгээ хамгаалаад, манай тамирчдын барилдааныг маш сайн судлаад, хамгаалж байгаа тамирчны өөдөөс дайчин барилдах гэж байгаа нь энэ гээд хий хоосон дайраад байх нь утгагүй.  Гэхдээ бас өрсөлдөгч тамирчин ингэж барилдвал тэгж арга барилаа солино, хамгаалсан тохиолдолд ийм мэх гээд тактик боловсруулж дэвжээнд гармаар санагдах юм. Багш дасгалжуулагч нар нь ч гэсэн хэлж өгдөг л баймаар.

Эхний өдөр О.Насанбурмаа шөвгийн наймд Оросын бөхийг хангалттай ялж болохоор байсан. Сүүлийн хэдхэн секунд дутуу байхад оноо алдаж байх жишээтэй. Өчигдөр Э.Сумъяа бас бүхэл оноогоор ялж болохоор байхад сүүлийн 20 гаруйхан секунд дутуу байхад давхар хамуулаад оноо алдаад, ялагдаж байх жишээтэй. Өчигдөр С.Батцэцэг гавьяат Америкийн тамирчнаас оноогоор илүү явж байж өөрөө дайрч ороод, дутуу хийсэн мэхэн дээрээ ажиллууллаа. Уржигдар ч бас тийм барилдаан гарсан. Энэ бол тактикийн барилдаан маш муу хийж байгаагийн жишээ. Оноогоо хамгаалж чадахгүй байна. 

Түүнээс биш манай тамирчид ялж чадаж байгаа.  Үүнээсээ болоод л ялагдчихлаа гэж харлаа. Зүгээр л бөх сонирхогч хүний үүднээс харахад шүү дээ.

Түүнээс гадна Монголын Чөлөөт бөхийн холбооны Ерөнхийлөгч Д.Дагвадорж  "Эмэгтэй баг хэвэндээ байгаа нь харагдлаа. 4 жилийн циклээр дүнгээ тавиулж байна. Суурь бэлтгэл нэг ийм байна. Япон сургууль гэж хэлээд байдаг нь энэ. Хүүхдүүд эхнээс нь явуулж эхэлсэн. Багш нар хүүхдээ явуулах дургүй. Явуулсан нэгнээ буцаагаад авдаг" хэмээн сэтгэгдлээ бичиж.  Энэ хүн ч гэсэн бас эмэгтэй баг ахиагүй гэдгийг харж, мэдэрч.  Эмэгтэй чөлөөтийнхөн маань нэг иймэрхүү, жаахан харамсмаар л барилдаан үзүүлчихлээ. Одоо эрэгтэйчүүддээ найдах л үлдээд байна.

Эх сурвалж: www.mminfo.mn сайт