Нийслэлийн АН-ын дарга Э.Бат-Үүл мэдээлэл хийлээ. Тэрбээр С.Зоригийн хэрэгт өөрийг нь дахин буруутгаж, сэжигтнээр татаад буй тухай ярив.

Хэвлэлийн хурлын эхэнд Э.Бат-Үүл “Намайг 2000 онд хууль зөрчиж, гэмгүй байхад хорьж байсан. Тэр үед би үгээ хэлж чадаагүй. Энэ үйл явдал дахин давтагдаж магадгүй учраас би үгээ хэлэхийг хүссэн юм” хэмээн мэдээлэл хийх болсон шалтгаанаа тайлбарлав.

Тэрбээр сонгууль бүрийн өмнө болон дараа өөрийг нь С.Зоригийн хэрэгт буруутгаж, шалгадаг болсныг хэлэв.

1998 он: С.Зоригийн хөнөөсөн өдрийн орой гэртээ байхад нийслэлийн Цагдаагийн газрын дарга Ганболд намайг хамгаалалтад авч байна хэмээн хэрэг болсон газар дагуулж очсон. Намайг очиход маш олон хүн бужигнаж байсан. Би бусдын адил цочирдсон. Тэгээд Ц.Элбэгдоржтой хамт гарсан. Тэгэхдээ малгайгаа мартаад гарсан. Энэ хэргийн дараа надаас гэрчийн мэдүүлэг авсан. Тэр үед малгайгаа мартсан нь тогтоогдсон хэмээн буцааж өгсөн. Тэгээд надаас дахиж мэдүүлэг, байцаалт аваагүй.

2000 он: УИХ-ын сонгуулийн өмнө намайг дахиж дуудаад “нөгөө малгай чинь байна уу” гэсэн. Би малгайгаа авчирч өгтөл “энэ малгай хэргийн газраас олдсон учраас сэжигтнээр татаж байна” гэсэн. Тэгээд намайг сэжигтнээр татсан. 2000 оны сонгуулиар яг өнөөдрийнх шиг МАН маш том ялалт байгуулсан. Тэгээд наймдугаар сард хүнд гар ч хүрээгүй байхад намайг хүн зодсон хэмээн Ганц худагт хорьсон. Тэрийг прокурор хүчингүй болгосон. Тэгээд суллагдсаны дараа дахиж энэ тухай асуугаагүй, яриагүй.

2016 он: Харин одоо намайг С.Зоригийг алсан биш алж байхад нь хажууд нь байсан гэж байна. Онц хүнд хэрэгт холбогдуулан дахин гүжирдэж байна. Би энэ асуудлаар прокурорт хандсан ч шалгаж өгөхгүй байна. Намайг амарч байхад тагнуулын байгууллагаас мэдэгдэх хуудас авчирч өгсөн. Намайг очтол дахиад сэжигтнээр татсан байсан. Эрүүгийн болон Эрүүгийн байцаан шийтгэх хуулинд байхгүй жишиг тогтоож байна. Нэг хэрэгт сэжигтний хоёр тогтоол гаргасан.  Хэзээ ч ийм зүйл байдаггүй. 16 жилийн өмнө сэжигтнээр татсан тогтоолыг маш нууц гэчихсэн. Маш нууц гэдэг нь бүх зүйл явцыг хаалттай байлгана гэсэн үг. Би энэ сэжигтний тогтоолыг зөвшөөрөөгүй. Тэгтэл хууль зөрчиж хийсэн тогтоолынхоо дагуу яллагдагчаар татаж байна. Би яллагдагчаар мэдүүлэг өгөхгүй гэсэн.

Үйл явц ийн өрнөсөн болоод одоо өрнөж буйг тэрбээр хэлэв. Мөн энэ хэргийг илрээсэй гэдгийг маш их хүсч, хэрэгтэн олдоосой гэж өдөр бүр залбирдгаа дуулгав. Учир нь өөрийгөө хамгийн их хохирч, хэлмэгдэж буй хүн хэмээн үзэж байгаа аж. Бас хуулийн дагуу шалгуулах хүсэлтэй байгаагаа хэлэв. 

Мөн өнгөрсөн баасан гаригт Э.Бат-Үүлээс хурууны хээ, цусны шинжилгээ авсан гэнэ. Хэрэг гарснаас хойш анх удаа, яллагдагчаар татсаныхаа дараа нотлох баримт хайж байгаа нь хачирхалтай гэдгийг тэрбээр хэвлэлийн хурлыг төгсгөлд хэллээ.

В.Бат