Баар, цэнгээний газруудыг 00.00 цагт хаах тухай болон нохой, муур устгах ажлын талаар холбогдох албаныхан мэдээлэл хийлээ. Энэ үеэр Улаанбаатар хотын Захирагчийн ажлын албаны "Хүнс худалдаа үйлчилгээний хэлтэс"-ийн дарга О.Нарантуяагаас дараах тодруулгыг авлаа.

-Ямар үндэслэлээр цэнгээний газрыг 00.00 цагт хаахаар болов?

-Томоохон баар, рестораны ойролцоо оршин суудаг иргэдээс санал ирсэн. Ялангуяа нэг давхарт оршин суудаг иргэд амгалан, тайван байдал алдагдуулж байна. Тиймээс шөнийн 04.00 цаг хүртэл баар, цэнгээний газрыг ажиллуулахгүй байх хүсэлтийг НЗДТГ-т удаа дараа ирүүлсэн. Үүний дагуу Улаанбаатар хотын Захирагчийн ажлын албанаас ажлыг хэсэг гарган судалгаа явуулж байна. Иргэдийн саналыг сонсож байна.

-Иргэд ямар саналтай байна вэ?

-Бид судалгаагаа залуу, дунд, ахмад гэсэн гурван чиглэлээр явуулсан. Судалгаанаас харахад ерөнхийдөө тавь, тавин хувьтай байна. Гэхдээ иргэдийн ихэнхи нь 04.00 цаг хүртэл үйл ажиллагаа явуулах нь зүйтэй гэсэн санал ирүүлжээ. Гэтэл нөгөө талд аж аху нэгжүүд 04.00 цаг хүртэл үйлчилгээ явуулах хүсэлтэй байгаа. Хоёр талтай асуудал юм.  Бид  удирдлагын зөвлөлийн хурлаар хэлэлцэж байж эцсийн шийдвэрийг гаргана. 

-Одоогоор цэнгээний газрууд хуучин цагийн хуваариар ажиллаж байгаа юу?

-Тийм ээ. 2015 оны долдугаар сарын 9-нд гаргасан захирамжын дагуу баар, цэнгээний газрууд шөнийн 04.00 цаг хүртэл үйл ажиллагаагаа явуулж байна. Одоогоор шинэ захирамж гараагүй.

-Захирамж хэзэээ гарах вэ?

-Шийдвэр энэ байдлаараа буюу 04.00 цаг хүртэл хэвээр үргэлжлэх байх.

-Өмнө нь цэнгээний газрууд 00.00 цаг хүртэл ажилладаг байсныг 04.00 цаг болгож өөрчилсөн. Энэ хугацаанд гэмт хэргийн тоо буурсан эсэх талаар судалгаа бий юу?

-Өнгөрсөн хугацаанд гэмт хэргийн гаралт урьд жилүүдтэй харьцуулахад буурсан хандлага ажиглагдсан.  Мөн аялал жуулчлалын улирлаар аж ахуй нэгжүүдийн ашиг орлого нэмэгдсэн судалгаа бий.

-00.00 цагт хааснаар далд гэмт хэрэг бий болно гэж мэргэжилтнүүд үзэж байна?

-Ахуйн архидалт, архийг шаглах асуудлууд гардаг ихээр гардаг.  Тухайлбал ТҮЦ болон таксинд архи зардаг. Улмаар гэмт хэрэг эрс нэмэгддэг гэсэн цагдаагийн байгууллагын судалгаа байдаг. Сүүлийн хоёр жилд харьцангүй энэ төрлийн гэмт хэрэг багассан хандлагатай байна.

-Нийслэлийн хэмжээнд баар, цэнгээний хичнээн аж ахуй нэгж байна вэ?

-Баар, цэнгээний газар, караоке зэргийг  оруулаад Нийслэлийн хэмжээнд 1500 гаруй аж ахуй нэгж энэ чиглэлээр үйл ажиллагаа явуулдаг.

Г.Тэгшсүрэн