Зам тээврийн хөгжлийн яамны шийдвэрээр Монгол-Оросын хувь нийлүүлсэн УБТЗ-ын ерөнхий хорооны гишүүдийг томилжээ. Гэвч томилогдсон гишүүд нь ажлын туршлага, мэргэжлийн чадваргүй талаар Улаанбаатар төмөр замын  Үйлдвэрчний эвлэлийн хорооноос мэдээлэл хийлээ.  Тус хэвлэлийн хуралд Монголын төмөр замчдын үйлдвэрчний эвлэлийн хорооны дэд дарга Б.Баяраа, тус хорооны орон тооны бус дэд дарга, эрхзүйч Б.Алтанхуяг, Улаанбаатар татах хэсгийн үйлдвэрчний хороон дарга Б.Наранхүү нар оролцов. Тэд УБТЗ-д улс төрийн томилгоо явагдсан гэдгийг онцолж байлаа.

Зам тээврийн хөгжлийн яамнаас УБТЗ-ын ерөнхий хорооны гишүүнээр Б.Цогтгэрэл, Б.Артур, Н.Буяндэлгэр гэх гурван хүнийг томилжээ. Б.Артур нь БНХАУ-д төмөр замын мэргэжил эзэмшсэн ч  төмөр замаар дагнан ажиллаж мэргэшээгүй хүн аж. Харин Н.Буяндэлгэр нь орос хэлний орчуулагч бөгөөд төмөр замын талаар мэдлэг, боловсролгүй гэдгийг хуралд оролцогчид хэлж байна. Улмаар дээрхи хүмүүс төмөр замын бодлого чиглэл, өнөөгийн байдлыг ирээдүйтэй нь уялдуулж, удирдан зохион байгуулахад учир дутагдалтай гэж үзэж буйгаа тэд дуулгалаа. Ерөнхий хорооны гишүүд ОХУ-д өнөөдөр эхэлж буй УБТЗ-ын удирдлагыг сонгох хуралд оролцохоор  явсан. Улмаар замын даргад УИХ-ын гишүүн асан Д.Загджав гэгчийг сонгох гэж байна гэж хардаж буйгаа хэлэв.

Энэ талаар Монголын төмөр замчдын үйлдвэрчний эвлэлийн хорооны дэд дарга Б.Баяраа “Төмөр замд улс төр орж ирснээр зөвхөн нарийн бүдүүн цариг гэж маргасаар 8 жилийг үдсэн. Энэ үед төмөр замын хөгжил бараг зогссон гэж хэлж болно. Улстөрчид мэргэжлийн байгууллагад ороод улс төр л хийхээс уг байгууллагыг хөгжүүлэх тал дээр санаа тавьдаггүй. Намынхаа даалгаврыг илүүд үздэг. Тиймээс УБТЗ-ын ерөнхий хороонд мэргэжлийн бус хүмүүсийг томилсонтой зэрэгцэн замын даргаар Д.Загджавыг томилохоор яригдаж байгааг эсэргүүцэж  байна” хэмээв.

Үүнтэй холбогдлуулан тус хорооносс Ерөнхий сайд Ж.Эрдэнэбатад ил захидал хүргүүлэх болсноо дуулгалаа. Тус захидалд  “Д.Загджав хэмээх төмөр замын мэдлэггүй хүнээр УБТЗ-ын ирээдүйн хувь заяаг жолоодуулах улс төрийн тогтолцоог явуулах мэдээлэл гараад байна. Төмөр замчид улстөрчдөөс ангид оршиход тусламж үзүүлнэ гэдэгт гүнээ итгэж байна” хэмээжээ.

Эл захидлаа Орос хэлнээ хөрвүүлэн ОХУ-ын Элчин Сайдын яаманд хүргүүлнэ гэдгээ мэдэгдлээ.

Зам тээврийн хөгжлийн яамнаас ерөнхий гишүүдийн томилгоог хийсэн учраас ОХУ-ын тал хүлээн авчээ. Нэгэнт шийдвэр ингэж гарсан учраас ерөнхий хорооны гишүүдийн доод албан тушаалд ажиллах хүмүүс зайлшгүй мэргэжлийн ур чадвартай боловсон хүчин байх нь нэн чухал. Тиймээс МТЗ-ын ҮЭХ-оос Ерөнхий сайд Ж.Эрдэнэбатад албан бичгийг энэ сард хүргүүлсэн байна.

Тус албан бичигт, ерөнхий хорооны гишүүдийн томилгоог Оросын талтай зөвшилцөн эргэн харах боломж  байгаа эсэх болон замын дарга, орлогч дарга нарыг томилохдоо төмөр замчдад танигдсан, мэргэжлийн хүмүүсийг томилуулах тухай хүсэлтээ илэрхийлэн, дэмжлэг хүсчээ.

Г.Тэгшсүрэн