УИХ-ын намрын ээлжит чуулганаар  2017 оны төсвийн төсөл, нийгэм, эдийн засгийн үндэслэл, мөнгөний бодлогыг эхлэн хэлэлцэнэ. Намрын чуулган нээлтээ хийсний дарааагаар УИХ дахь МАН-ын бүлгийн дарга Д.Хаянхярваагаас  цаг үеийн асуудлаар зарим зүйлийг тодрууллаа.  

-Засгийн газраас УИХ-д  ирэх оны төсвийн төслийг өргөн бариад байгаа. Та хуулийн төсөлтэй танилцаж амжив уу?

-2017 оны төсвийн төсөлтэй нарийвчлан танилцаж амжаагүй байна.  Төсөв  хүнд байгаа. Уул уурхайтай холбогдсон томоохон төслөө хөдөлгөж байж орлогын эх үүсвэрийг нэмэгдүүлнэ гэсэн үндсэн тооцоолол дээр тулгуурласан байна лээ. Төсвийг чамбайруулах тал дээр аль аль талаасаа анхаарч ажиллах шаардлагатай гэж харж байна.

-Засгийн газар эдийн засгийн өсөлтийг гурван хувьд хүргэх  зорилтдоо ирэх жил хүрч чадах болов уу?  

-Засгийн газар тооцоод хүрнэ гэж үзэж байгаа бол тэр тооцооллыг би сайн харж амжаагүй байна. Гэхдээ гурван хувьд хүргэх амаргүй зорилт. Бид нар Тавантолгой, Оюутолгойтой холбоотой томоохон төслөө хөдөлгөж чадах юм бол эдийн засаг сэргэх боломж бий. Тэгэхээр боломж байхыг үгүйсгэхгүй л юм. Энэ талаар тодорхой юм хэлж чадахгүй байна.

-Ирэх оноос Монгол Улс их наядаар хэмжигдэх өр зээл төлнө. Орлого дутагдалтай байгаа учир Засгийн газар бонд босгохоор болсон. Үүнээс өөр гарц байгаагүй юу?

-Бонд босгохоос өөр боломж байхгүй. Гадаад, дотоодоос авсан зээлийн нийт хэмжээгээр 6,6 их наяд төгрөг хүрч байгаа. Энэ нь төсвийн нийт орлогоос давчихсан. Тиймээс бонд гаргах эсвэл урьд нь авсан зээлдээ зохицуулалт хийж аль болох боломжтой хувилбараар шийдэх арга зам хайна. Үүнийг УИХ-аар нэлээд нухацтай ярилцах байх. 2017 оны төсвийн төслийг харахад бидэнд дээшээ тэнгэр хол, доошоо газар хол болчхоод байна. Бид 6,6 их наяд төгрөгийн өр төлөөд, дээр нь төсвийн зарлагаа нөхөх арга замыг зөв хайх хэрэгтэй.  

-Бондын эргэн төлөлтөөр зээлээ төлөх боломж бий юу?

-Бондын эргэн төлөлтийн тухай асуудлаар Хөгжлийн банкинд шалгалт орсон. Шалгалтын хариу удахгүй гарна. Гэхдээ шалгалтын үр дүнд 6,6 их наяд төгрөгийн өр төлөх хэмжээний эх үүсвэр босно гэхэд итгэл төрөхгүй байна. Шалгалтын явцаас харахад бондоос авсан зээл эргэн төлөгдөх боломж туйлын хомс байна лээ.

-Та “Стэнд бай” хөтөлбөрт хамрагдахыг дэмжиж байгаа юу?

-“Стэнд бай” бол бидний өмнө байгаа сонголтуудын нэг хэсэг. Ер нь бол урт хугацаатай хөгжлийн зээл хайх шаардлагатай. Өөрөөр хэлбэл 10-30 жилийн хугацаатай, бага хүүтэй зээл авах нэг боломж бий. Тиймээс Дэлхийн банк, олон улсын байгууллагуудаас бүхий л арга замыг хайж, хамтарч ажиллах ёстой.

Н.Энх